صفا ویروبدی گلشن بتوله ابر ایزدی
شکفته لندی غنچه سی آچوب گل محمدی
جهانیانه وعدهء ظهورینی خدا ویروب
مریض عشق اولانلارا همیشه لوق دعوا ویروب
آچوب صفالی گلشنه دوباره دن صفا ویروب
بهشته افتخار ایدر اودور که باغ احمدی
زمان صبحده چخوب شتابیله حجابدن
قرار و صبر و طاقتی آلوبدی آفتابدن
بو آفتاب عشقدور سپهر بوترابدن
زمان صبحده اولوب آیین گونون مؤیدی
جمالینی گورن دیوب که بنزیری پیمبره
اوشاقلقندان اوخشوری صلابتینده حیدره
یوزونده خال هاشمی تاپوبدی یاخشی منظره
جهانه ظلّ رحمتی سالوب گوزل رسا قدی
آتا حسن عمو حسن تمام نسبتی حسن
یوزی حسن گوزی حسن کلام صحبتی حسن
خفا و ظاهری حسن سرشت و خلقتی حسن
اوزی گوزل سوزی گوزل گوزلّرین سرآمدی
باباسی میر لافتی' آتاسی شاه کربلا
رضای حقه مرتضی' بو شاهه فاطمه آنا
ملاحتینده مصطفی' وجاهتینده مجتبی'
بونون وجودونی خبر ویروبدی جدّ امجدی
دوشنده سجدیه ویرور سجود ساجدی نشان
تکلّم ایلسه اولار علوم باقری عیان
ایدوبدی گنج سینه ده حدیث صادقی نهان
بولاردی اورگدوبدولر جهانه درس ابجدی
تمام مشکلاتیده شبیه اولوبدی کاظمه
همومه غالب اولماقی بولوبدی صبری لازمه
جهان نامنظّمین وار احتیاجی ناظمه
بو ناظم جهان خدا هایاندا قالدی گلمدی
رضای حقه وار اونون رضا کیمی رضایتی
خجل ایدوبدی حاتمی جواد تک سخاوتی
امام هادیه مثل طریقهء هدایتی
اریکهء هدایته سالاندا عدل مسندی
ظهور ایدوب آتاسینون بالادا اصل هیبتی
ائمه محترم سایوب او صاحب جلالتی
بویوکدی شأن و شوکتی اوجا مقام رفعتی
همیشه لوق خدا ویروب اونا جلال سرمدی
دولوبدی ظلموله جهان هایاندا قالدی گلمدی
ظهوره منتظر اولان هایاندا قالدی گلمدی
آناسی قانینی آلان هایاندا قالدی گلمدی
گل وصالی ای خدا ید وصالی درمَدی
- دوشنبه
- 10
- خرداد
- 1400
- ساعت
- 16:41
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه