ای منیم بختیمی قاره ایدن اوغلوم گوزون آچ
ماتمینده باشما کول سپن اوغلوم گوزون آچ
وار عجب منظره سی، جسموین ای سرو کنار
باشا باش یاره دی گویا گل آچوب باغ بهار
جسموین گلشنی طاقتلری دللردن آلار
(گوزون آچ ای گل باغ حسن اوغلوم گوزون آچ)
گتورر نالیه بو حالون امام حسنی
بطنوی پارچالیوب نیزه ایله قوم دنی
ایلیوب خانه زنبوره مثل تیر، سنی
ای ستاره ساینی سان ویرن اوغلوم گوزون آچ
بویانوبسان باشا باش قانه اوغول لاله کیمی
بورویوب صورتوی قرمزی قان هاله کیمی
بو منم گوز یاشی ایثار ایلین ژاله کیمی
توکورم گوز یاشیمی دیده دن اوغلوم گوزون آچ
اُلومونله بو منیم قلبیمه گور نیلمدون؟!
دِیَن اولماز که اورک طاقتینی پِیلَمدون
ایوین آباد اولا شرمنده منی ایلمدون
آناسین مقترن فخر ایدن اوغلوم گوزون آچ
طاقتون طاق ایلیوب طاقتیمی آلدی عدو
سنی توپراقه منی قاره گونه سالدی عدو
بلمدی دلده بو غم تیری مگر قالدی عدو؟
یاتما بیله ای ایاقدان دوشن اوغلوم گوزون آچ
دور بو وضعیله اوغول توپراقا سن باتما بیله
نو عروسی غم هجرینده چوخ آغلاتما بیله
خلعت عیشوی گیی عالمی سن آتما بیله
قانلو پیراهن عشقین گِیَن اوغلوم گوزون آچ
یاخشی آغلار گوزیله قویدون اوغول فاطمه نی
نه علاج ایلسون آخر بیله گوردوقجا سنی
طوی اساسون دوشنوب، دور اوغول آغلاتما منی
حجلهء عیشینه ای تیز گلن اوغلوم گوزون آچ
آهیمیله بو فنا ملکنی برباد ایدرم
خانهء محنت و درد و غمی بنیاد ایدرم
نعشوی گوررم اوغول ناله و فریاد ایدرم
ایدرم خیمه نی بیت حزن اوغلوم گوزون آچ
طوی اساسی قورولوبدور سنه لیک آغلور حرم
گوزونون یاشنی هی عارضینه باغلور حرم
عالمی ماتمه چکدی، فلکی داغلور حرم
گور بو احوال پریشانی سن اوغلوم گوزون آچ
نوعروسین بالا بوندانصورا احوالنه وای
بولسه هر کیم بیله حالی، دیه جاق حالنه وای
ظلم اَلیله پوزولان حجلهء آمالینه وای
ای عروسین ایلیین ممتحن اوغلوم گوزون آچ
طوی حناسی قویولوب اَللریوه قاندان اوغول
قره معجر توکولوب دوروه هر یاندان اوغول
قیز گلین باش یولوری سیر اولوری جاندان اوغول
بیله طوی بیله عزا یوخ گورن اوغلوم گوزون آچ
قاسمین حجله سینه صرصر ظلم اَسدی نگین
رشتهء عمرونی مقراض اجل کسدی نگین
گر قبول ایتسه اوزی بیر بو سوزون بسدی نگین
ای منیم بختیمی قاره ایدن اوغلوم گوزون آچ
- چهارشنبه
- 12
- خرداد
- 1400
- ساعت
- 15:59
- نوشته شده توسط
- یوسف اکبری
- شاعر:
-
مختار وطن پرست
ارسال دیدگاه