آغلاما اصغریم ای جانیم اوغول
(اوجالور گویلره افغانیم اوغول)
گوزلرون یومما اوغول آچ گوزووی
بولورم آغلاماقوندان سوزوی
صاق صولا وورما علی جان اوزووی
چاره یوخ، یوخدی بیر امکانیم اوغول
آغلادور عالمی بو حالون على
عطشون ویرموری اِمهالون على
پوزار عالملری بو حالون على
نیلیوم طفلک گریانیم اوغول
فلک عشقیمه بیر اولدوزودون
سفرهء عیشیمه اوغلوم دوزودون
دفتر عمرومه مینلر سوزودون
گل دیله ای منیم عنوانیم اوغول
قورخورام نجم کیمی سن آخاسان
آخوب عالملری غمله یاخاسان
سن آخاندا آتاوا بیر باخاسان
آخما ای نجم درخشانیم اوغول
دم بدم سن علی گریان اولوسان
ابر تک آغلیوسان هی دولوسان
غنچه تک بس نیه آخر سولوسان
دِنه ای لالهء نعمانیم اوغول
کاش اُليديم علی بو گوندن ازل
گورمییدیم بیله بیر غملی محل
عیشیم اولدی نه ايديم درده بدل
وار عجب حال پریشانیم اوغول
قورویوب سود، سووا یوخ راه وصول
آغلاما اولماگلان بیله ملول
عمون عباس ایلییَر ایمدی حصول
صبر ایله ای گل ریحانیم اوغول
سن اوغول عالمی حیران ایلدون
خانهء صبریمی ویران ایلدون
هامونی خیمده گریان ایلدون
آغلاما ای قوزی قربانیم اوغول
تب آلوب یکسر اوغول پیکریوی
ووروسان صاق صولا بال و پروی
اَمیسن حسرتیله لب لریوی
وای منه ای گل عطشانیم اوغول
بو نه عالمدی اوغول اُلسون آنان
صبریمی آلدی سنون حالون امان
سن یورولدون منیده یوردون اینان
سنه قربان بو قوری جانیم اوغول
صابر و شأنی دی صرّاف سخن
آلدون الهام ایلدون نظم محن
سن نگین، اولّار الوب دُرّ ِ عَدَن
اولموسوز خادم سلطانیم اوغول
- چهارشنبه
- 12
- خرداد
- 1400
- ساعت
- 16:3
- نوشته شده توسط
- یوسف اکبری
- شاعر:
-
مختار وطن پرست
ارسال دیدگاه