باشون اولار جداده منه جلوه گر اوغول
هر بیر ستاره جلوه سینه رشک ایدر اوغول
سن تک ستاره نی گورن اولماز بو دهریده
گورسه نقدری نجم لری دیده ور اوغول
هاله ووروب جمالوه افسوس یول توزی
گویا دوشوب محاقه جمال قمر اوغول
ای قانه باتمش اولدوزوم آخما بو نوعیلن
آچ گوزلرون بو بیکسه ایت بیر نظر اوغول
گور بیر نه نوعی دوشدی آنان قاره گونلره
ظلمتدی عالمیم نه ایدیم سربسر اوغول
بیر حاله قالمشام علی یوخ حالیمی بولن
بولمز مگر که اوغلی اُلن دربدر اوغول
قانلی باشون که جلوه ایدر قلبیم اوت دوتار
گوز یاشی بو شراری نجه سوندورر اوغول
بولمم، عطش مصیبتوه آغلیوم سنون
یا اینکه بو کسوک باشوا سودامر اوغول
واله دی عالم اهلی آتان صبر و تابینه
مدفون ایدوب نه نوعی سنی دیده تر اوغول
افسوس لر اولا علی مدفن ده یاتمادون
آخر اویاتدی نیزه ووران کیمسه لر اوغول
بی شرملر ووراندا یره نوک نیزه نی
قونداقون اولدی نی ده او دم جلوه گر اوغول
پیکردن آیری سالدی عدو قانلی باشوی
اولدوم او ساعتونده عجب خونجگر اوغول
کوللر اَلندی باشیمه باشون گورن زمان
اول وقتیدندی چولده آنان هی ملر اوغول
یورقون دوشوبدی جسمون علی آگهم اوزوم
شه سینه سینده یاتسان اگر دینجلر اوغول
یات مرهم اولگلان آتاوین یاره قلبینه
کرب و بلالی لار بیله مرهم دوشر اوغول
امّا باشون بلایه سالوب چوخلی باشلاری
یاندی یاخلدی منله هامی همسفر اوغول
لیلا گورنده قانلی باشون باشنه وورور
عمّن باخاندا اشکین عذاره اَلَر اوغول
قورخوم بودور که خردا باشون نیزه دن دوشه
جولان ویرنده مرکبه قوم سقر اوغول
باشون مقابلمده دی ای باشیمون تاجی
گیتسن کناره روح و روانیم گیدر اوغول
نیلوم گورنده ده سنی تاب و توان گیدور
یوخ دردیمون دواسی منی اُلدورر اوغول
گوردوم بلاد کوفه ده چوخلی آنالاری
آلمیش قوجاقه اوز بالاسین هی اُپر اوغول
(چاتمور اَلیم جداده اُپم قانلی لبلرون)
بو حسرتیمدی قلبه سالان چوخ شرر اوغول
گونلر ایوینده قالدی باشون وای ربابه وای
گورمز آناوی سایه ده هیچ ذی بصر اوغول
یاد ایلرم سوسوز دوداقون، آغلاماق سسون
ایچمم سرین سو، آغلارام، اول باخبر اوغول
ختم ایله بو بیانی (نگین) قورتولان دگل
بسدور بو قدری ذکر مصائب، گورر اوغول
- چهارشنبه
- 12
- خرداد
- 1400
- ساعت
- 17:17
- نوشته شده توسط
- یوسف اکبری
- شاعر:
-
مختار وطن پرست
ارسال دیدگاه