گوردی موسی یولدا بیر مرد شبان
ایلیوب بو سوزلری ورد زبان
ای منیم پرودگاریم هارداسان
هارداسان ای تاجداریم هارداسان
هارداسان ای نِی ده کی ناییم منیم
هارداسان ای گویده کی آییم منیم
هارداسان ای من ئوزوم قربان سنه
هم قویونلار هم قوزوم قربان سنه
بو سؤری آردینجا من چوپانوام
قوچ قوزی یوخ، من ئوزوم قربانوام
ای یری ای گویلری خلق ایلییَن
ای آنالار سینه سینه سود ویرن
گلسن ای شه نوکر اوللام من سنه
صادقانه چاکر اوللام من سنه
گلگیلن تا من سنه خدمت ایدیم
خدمت ایلوم من یرون راحت ایدیم
گلگیلن نعلینوین گردین سیلیم
گلگیلن تا قلبوین دردین بیلیم
بیر قوناق گل، قالمیوب منده دوزوم
باشوه هر گون دولانّام من ئوزوم
سود گتورّم گلسن ای شه، من سنه
نوش ایدوب احسن دیرسن سن منه
گلگلن تا یولّارووا گُل سریم
خار باتسا گر، ایاقوندان دریم
گلمسن بو سینمی چاک ایلرم
گلسن امّا رختوی پاک ایلرم
شانه وورّام زلفوه ای شاه من
تا جمالون آرتورام ای ماه من
تا شبان بو سوزلری ورد ایلدی
خشمه گلدی اوندا موسی نیلدی
سویلدی موسی اونا ای اهل قال
سن کیمیله ایلوسن بیله مقال؟
ویردی پاسخ حضرت داداریلن
یر گویی خلق ایلین معماریلن
دوندی فریاد ایتدی ای چوپان لال اول
دولدی کفروندن سنون صاقیله صول
بو نه سوزلردور دیورسن ای کَفور
ساحت حقدن بو سوزلر دورِ دور
حق مگر انسانئدور سود میل ایده
یا ایاقی واردی یولدا یول گیده
حق مگر انساندور زلفی اولا
گرد و خاکیله خَمِ زلفی دولا
یا مگر سنلن منیم تک قلبی وار_
غصه لنسین قلبی؟ ای جاهل شعار
پاک یزدان سن دییَن لردن بری
لیسَ شئٌ مِثلُه، ای مُفتری
شاهدور امّا که شاه بی بدل
باطن و ظاهردی اول شاه ازل
کس سسون بو نوعی سن ایتمه دعا
قورخورام نازل اولا گویدن بلا
تا که موسی ایلدی بیله خطاب
سندی قلبی ردّ ایدوب بیله جواب
قلبیمی سندردون ای موسی منیم
لرزیه گلدی بو دم جان و تنیم
جام قلبیم سندی اولدم سینه چاک
سرّیمه آگهدی اول دانای پاک
قلبیمه مرهم سالار اول مهربان
تا گوراخ نیلر خدای آسمان
تا دیوب بو سوزلری اول دلشکست
تیر محنت قلبینه ایلوب نشست
دورمادی یول آلدی صحرایه طرف
قلبی امّا حیّ ِ اعلایه طرف
وحی اولوندی حضرت داداریدن
کشف اولا موسایه سرّ کاریدن
امر حقله سویلدی وحی خدا
ایلدون سن بنده می مندن جدا
قلبنی سندیرمسان چوپانیمون
اول ثناخوانیله مدحت خوانیمون
من او چوپانون ثناسین خوشلارام
ذکر بی روحی تماماً بوشلارام
ذکر چوپان ذکر شیرین دور منه
جان چوپان یار دیرین دور منه
من سنی گوندرمیشم وصل ایتماقا؟
یا منیله خلق آرا فصل ایتماقا؟
راضی اولما فصل حقّ و خلقه سن
آیریلق سویمز خدای ذوالمنن
هر او کس وصل ایلیه بیر کس منه
نصرت ایلوب یابن عمران ذوالمنه
هر او کس سندرسا قلب مومنی
سندروبدور طاق بیت ایمنی
قلب مومن جایگاهیم دور منیم
اهل فقره خانقاهیم دور منیم
قلبوزی آباد ایدون ای بنده لر
قیددن آزاد ایدون ای بنده لر
هر او کس بنده اولا بو ساحته
بی گمان چاتدّورام عالی رتبته
ربّم امّا ایلرم پروردگار
ظلّ لطفیمده اولار ایزد وقار
گوش و چشم و هم لسان اولّام اونا
دست و پا و هم زبان اولّام اونا
فعلی اوز فعلیم اولار بی شک و ریب
هر خلل دن پاک اولار قالماز بیر عیب
(بو سوزون شرحی مفصّل بابدور
باب یوخ مین لر کتاب نابدور)
یعنی قورتارماز بونون شرحی یقین
شرح باطن، نه که ظاهر، ذویقین
هر کس آنلار بو سوزی ئوز گامیجه
راه حقده گوتدوقی اَقدامیجه
الغرض موسانی حق توبیخ ایدوب
دست و پاسین پایبند میخ ایدوب
بو طرفده سرزنش موسی اولوب
اول طرفده لطف حق پیدا اولوب
آغلیوردی اول شبان گلدوقجا یول
سسلنوردی سن خدایا شاهد اول
من سنون صدقیله ای سلطان ناز
ایلیردوم مدحوی با سوز و ساز
آغزیمی تیکدی اونون اول سوزلری
گل ایله بو قصّیه سن داوری
آغلادی بیر نچه ساعت هائیلن
دادیله بیدادیله ایوائیلن
هوش آپاردی دوشدی بیخود اول شبان
یاتدی، امّا بخت اویاندی اول زمان
گوردی رؤیاده عجیبه نوریلر
غبطه ایلور نورینه مین طوریلر
حقّ منّان و ودود و عشوه گر
جلوه ایتدی اول شبانه بیر نظر
جاننی بیر معدن راز ایلدی
راز حقله عالمه ناز ایلدی
جام قلبین دست لطف دادگر
ایتدی ترمیم اولدی بیر جام دِگر
اولدی محرم سرّ یزدانه شبان
گوئیا علّامه دور ساده چوبان
نوگل توحید اَکدی قلبینه
نقش مهر و عشق چکدی قلبینه
جانی اولدی کشتزار کم نظیر
عالِم سرّ خداوند خبیر
حق اونی یار ایلدی ئوز عشقینه
یار دلدار ایلدی ئوز عشقینه
رحمت بی علّتی جوش ایلدی
قلب چوپانی صفاپوش ایلدی
دوشدی موسی چوللره ناله کنان
سسلنوردی هارداسان سن ای شبان
گزدی موسی تاپدی چوپانی او دم
ایلدی بیر نچه یول دم بازدم
سویلدی موسی شبانه ای سعید
مژده ویر که حضرت حیّ ِ مجید_
ایلیوبدور طاعتون لطفا قبول
اولما مندن حقّه خاطر دل ملول
سویله هر سوز سویله سن ای نیک بخت
سهل ساندی سوزلرون یزدان، نه سخت
گوش جانیم سرّ ِ یَسِّر سمع ایدور
غیرِ یَسِّر آیری لفظی منع ایدور
محفل حبّ خدادور راحت اول
یار غمخواریله گرم صحبت اول
ایلدی چوپان او دم بیله خطاب
موسیا ای حضرت وحدت مَآب
بو چوبان اول گوردقون چوپان دگل
فرد جاهل، عاطل و نادان دگل
لطف حق الطافنی مشمول ایدوب
بو شبانی لطفله مقبول ایدوب
لطف ایدوب ئوز بحر توحیدین منه
زورق روحی چکوبدور ایمنه
قطرهء علمیم اولوب دریا بو گون
خلعت ناجور اولوب دیبا بو گون
رحم ایدوبدور دیدهء خون پاشیمه
تاج عبدیّت قویوبدور باشیمه
بانی خیر اولموسان موسی منه
حشره تک مدیوندور بو جان سنه
حق سنون تائیدوی افزون ایده
شهر علمه عاشق مفتون ایده
شهر علمین سیرینی قسمت ایده
اهل علم و فضله هم صحبت ایده
شهر علمین شرحی قورتارماز یقین
دوشدی یاده تاجدار مرسلین
شهر علمین شرحنی بیر حق بولور
بیر نبی بیرده علی الْحق بولور
شهر علم مصطفادور کاینات
گرد راهی انجمیله بو کُرات
شهره بیر دروازه لازمدور یقین
شهر بی دَر هاردادور ای ذو یقین
درب شهر مصطفادور، مرتضا
شاه عالم شهسوار لافتی'
شهسوار بی بدیل روزگار
لافتی لاسیفْ الّا ذوالفقار
شهسوار عرصهء علم و عمل
شهسوار عرصهء جنگ و جدل
فضل مولا ختم اولماز قیل تمام
اوز آدیله قوی اولا حسن ختام
یاعلی ای عالمینه ملتجا
عشق پاکوندور بیزه تک مرتجا
باب علمه حق سیزی خزّان ایدوب
معدن فضل و ادب یزدان ایدوب
علموین بیر قطره سین ایتسن عیان
قطره تک محسوب اولار بحر جهان
بحر علموندن بیزی سیراب ایله
مستِ سرمستِ شراب ناب ایله
یاعلی سیز که (نگین) ایتدوز منی
حشره تک لطفه قرین ایتدوز منی
یازدروب بو مطلبی حاجی_صمد *
ویر جزاسین لطفیله بی حصر و حد
*حاج صمد ابراهیمی از مداحان مخلص شهر تبریز است
- چهارشنبه
- 12
- خرداد
- 1400
- ساعت
- 17:20
- نوشته شده توسط
- یوسف اکبری
- شاعر:
-
مختار وطن پرست
ارسال دیدگاه