توپراقلار اوسته دوشموشیدی شاه انس و جان
سویموشدولار لباسنی اشرار بی امان
(آتلار قویانمازیدی ایاق ایسّیدن یره)
عذر ایسترم بو عرضیمه یا صاحب الزمان
اول ایسّی قوملار اوسته کی عریان غریب امام
یاتمش نه حالیلن یوخودی بیرجه سایبان
داغ ایلمیشدی آهن و آلاتی آفتاب
زحمت ویروردی گُل بدنه تیغیله سِنان
ضَمّ ایلمیشدی توپراقا آتلار وجودینی
آتلار ایاقی قانه بویانمشدی اول زمان
مکتوب ایدوبدی بعضلری، دورد آغاج یولی
قانه چکوبدی آتلار ایاقیله کوفیان
اوخلار ایدوبدی طاق ظفر سینه سینده نصب
دوشموشدی فاتحانه شهنشاه خسته جان
بیر منظر غریبیدی صحرای کربلا
ایلردیلر نظاره او صحرایه قدسیان
قان موج ایدردی هریانا گودال عشقدن
گویا شفقده غوطه وورور مهر آسمان
چون شه کُشان امّتی گورموشدی بی حجاب
آغلاردی حال شاهه سمائیله کَهکَشان
زینب گزردی قتلگهی بیله حالیده
تا بلکه جسمنه تاپا بیر روحیله روان
اِشکسته اسلحه بوروموشدی چوخور یری
سسلردی هارداسان دانش ای قلبیمه توان
آلات حربی بیر آرادی زخمدار الی
اوخ نیزه تیری ایلدی زینب اویان بویان
آختاردی تاپدی قارداشین امّا هزار حیف
نعشون گوروب سالوبلا یوزی اوسته ناگهان
بیر صیحه چکدی آغلادی آغلاتدی عالمی
فریاد و نوحه باشلادی شوریله موکَنان
چوخ نوحه خوانلق ایلیوب عمرونده بو خانیم
امّا بو نوحه مِثلینی ویرموبدی هیچ نشان
بو نوحه مِثلی هاردا اولار عالمین آرا
هاردا گوروب بو محنتی شوریده بانوان
گوتدی او لخته قانلاری بیر چکدی باشنه
سرمشق نوحه خوانلقی آل بوردا نوحه خوان
بیر آه جانگدازیله دنیانی داغلادی
یاندی شرار آهینه ارکان کن فکان
بیر تسلیت ویرن هانی مظلومه زینبه
گل بیر نظاره قیل غمه ای میر مومنان
دوشدی وداعی یادینه قارداشنون او دم
فکر ایتدی اللرین تاپا تسکینه اول زمان
قالدی اورکده اللری غمدیده زینبین
بو طرزیلن او علّتی من ایلرم بیان
دوشموشدی خردا بارماقی آلات حرب آرا
کسمشدی دست پاکنی ظلمیله ساربان
سسلندی دور فدا سنه ای ذبح بی بدیل
قربان کسیلمیش اللروه هر ایکی جهان
سالموبلا هیچ شهیدی بو احواله سن کیمی
شل اولسون اللری سنی بو حالته سالان
ممزوج ایدوبله لحموی عظمیله قوم کین
طرحین پوزوبلا جسموون احزاب شامیان
سنسن حسینی زینبون ای عالمه پناه؟
یا اینکه من خطایه دچار اولموشام بو آن؟
اول مرتضا که سویمادی دشمن لباسنی
عریان سالوبلا اوغلونی صحرایه الامان
جسمون بو نوعیلن که سویوب ظلمیله عدو
قربانه اوخشادوبدولا اشرار بی نشان
بُلمَم نه نوعی باشوی ذبح ایلیوبدوله
دوتموش فضای قتلگهی لخته لخته قان
ایکاش اُلیدی زینبون ای جان عالمین
تا گورمیِیدی بیله سنی قاننه باتان
بو قتلگاه عشقدی یا لاله خرمنی؟
یا چشمه دور که هِی ویروری تازه تازه قان؟
جوش ایلیَن زمانیده قان چشمه سی دونن
سدّ ایلیوبدی قاننی داشیله داش آتان
بو غصّه زینبین یخاجاقدور ایوین حسین
قلبون سوکوبدی سینه وه اوچ شعبه اوخ ووران
خنجرلریله جسموی اوراق ایدوبدولر
گویا دوشوبدی قان آرا بیر مصحف قر'آن
کندویه وار شباهتی بو جسم چاک چاک
اوخلاردی نَحلی، جسم شریفون ده مثل شان
قلبیم دیور که خولیه مهمانیدون گجه
آیا یرون نجیدی نه نوعیدی میزبان؟
ایکاش یاتدوقون یری راحت ایدیدیلر
آسوده دینجلیدی باشون ای جهانه جان
بیر عطر آشنا گلوری جان مشامنه
گویا گلوبدی پیکریوه باش چکه آنان
شک یوخ یاخوبدی قانوی آغ زلفونه آنام
اولموش گورنده پیکر منحوری باغریقان
قارداش سوروش گچن گجه دن تا دیوم سنه
نوحه اوخوردی حالوه بیر عدّه روضه خوان
حاشا که من گچن گجه آسوده یاتمشام
اولموشدوم آه و زاریله اطفاله پاسبان
یغمشدی بیر یانان چادرا قیزلاری باجون
ویرمیشدی قوملار اوسته یتیمانیوه مکان
اصغر آناسی صبحه کیمی گوزیاشی توکوب
قان ایلیوبدی قلبنی بیر تیریله کمان
سسلردی حشر اولونجا سنه آغلارام علی
هاردا ایدوبله سود امرین حلقنی نشان؟
گوردوم دونن خیمده که اوت دوتموسان اوغول
اوتلی هوا اولوردی بو گل جسموه وزان
اَسموردی لااَقل او زمان باد سرد و بَرد
قالمشدی حسرتنده بو دلخسته باغبان
سن جان ویرنده من یوخودوم حالوی گورم
قالمش نه حاله بس گورسن شاه بی کسان؟
گوردوم گلنده خیمه لره قان ایچینده سن
باتمشدی قانه اللری یالقوز قالان آتان
ایکاش آنان رباب اُله بوش گورمیه یرون
بیر کس خبر دوتانموری بس هاردادور بالان
وار حقّی بیکس عمه لرون گر سوروشموری
بیر کیمسه گر سورشسا اولار باغریقان آنان
اُلسون رباب آنان که آخور چوللره فرات
سنده که تشنه یاتموسان ای طفل بی زبان
هر یرده رسمدور سودامر، سود، امر یاتار
گَل سود گلوبدی سینمه ای قلبمه توان
امّا یوخومدی چاره که دفن اولموسان علی
توپراقلار ایچره یاره لی حسرتله یاتموسان
ایکاش مدفنونده قالا نعشون ای اوغول
حفر ایتمیه زمین بلانی دم ِ سِنان
قورخوم بودور که پیکریوه دشمن ال تاپا
بی خانمان آناوی ایده دیده خونفشان
تاپسا یارالی نعشوی بو قوم کینه جو
نصب سِنانی ایلیه جاق ظلمیلن سَنان
نسگللرونله حشره کیمی آغلارام علی
گولمز یوزوم دا بیرده منیم بو سوزی اینان
بیر لحظه گر کسیلسه گوزوم یاشی کور اولوم
هرگز بو سیله سویلمرم گلگلن دایان
دریاجه گوزیاشیم آخا جای عجب دگور
بیر بحردور که یوخدی اونا ساحل و کران
بو زورق وجودیمی دریایه سالمشام
گوزیاشی بحر غمدی بو دل مثل بادبان
قارداش رباب دردی بیزه اوزگه درد اولوب
یوخدور علاجی دردینون ای عالمه امان
دوتموشدی بیله شام غریبان باجون سنه
گورمز بو نوعی شام غریبانی هیچ زمان
توپراقلار اوستی بستریدی اهلبیتوه
صبح ایلیوب او حالیله آشفته بو زنان
یوخ فرصتیم که میر سپه هی ورور نهیب
فوراً سوار اولون که اولاق مقصده روان
قارداش مسافرم گیدورم دور اذان بویور
بلکه بلادن حفظ اولا بو اهل کاروان
خواهی نخواه میندیله یکسر مخدّرات
جبراً چکردی کوفیه نسوانی ساروان
مرسومدور گیدنده مسافر اوزاق یولا
قومیله اقرباسی دالیجن ویرر اذان
بو رسمی زنده ساخلادی سلطان مشرقین
حیران قالوب بو رسمه جهانیله کن فکان
قویدی ایکی کسیلمش الین قانلی توپراقا
قان ایچره اوتدی زحمتیلن شاه بیکسان
دوشدی فشاره قانه باتان اوخلی پیکری
فوّاره تک قان آخدی وجودیندن اولزمان
لحن حجازیلن دیدی تکبیری سوزیله
آفاقی صوتیلن بورودی شاه تشنگان
زینب ایشتدی لحن حجازین حسینینون
ال آتدی یاره اللریلن باشنه او آن
الله یارالی پیکریوی حفظ ایده اوزی
مندن که اَل گوتورمیه جاق ظلم کوفیان
یولّاردا همرهیم دگی عبّاسمیز حسین
بولَّم که غم لریم دگی هرگز ختام اولان
گیتدیم منیله شمر جفاجودی همسفر
یوخدور بو کارواندا اباالفضل پهلوان
قبر ایچره حقّی واردی اگر آغلاسا منه
عبّاسدور غیوریدی چون میر بانوان
امداد ایدوب #نگینینه کشّاف کربیمیز
سوزلر اودور که گون کیمی واضح اولور عیان
تاپشورّام ایلییَر اونی دعوت بو وادیه
تا ذکر ایده مصائبی با چشم خونچکان
سن کشتی نجاتسن ای ناخدای عشق
باخ بو (نگینه) تا اولا بیر تارِ بادبان
سِحرٌ مِنَ البَيانه جلا ویرگیلن اُوزون
صاف ایتماقا بو آیِنه نی اولگلان ضِمان
- چهارشنبه
- 12
- خرداد
- 1400
- ساعت
- 17:46
- نوشته شده توسط
- یوسف اکبری
- شاعر:
-
مختار وطن پرست
ارسال دیدگاه