مهدیا عشقونده من زار و پریشان اولموشام
گوزلریم یولدا قالوب هجرونده گریان اولموشام
هارداسان ای جان جانان گل قدومیندن ئوپوم
ای نگار مه جبین عشقونده نالان اولموشام
دوشموشم چولدن چوله مجنون کیمین آواریم
چاره سیز بیر عاشقم چوللرده ویلان اولموشام
بیر گوله خاطردی بلبل ایلیر شور و نوا
منده بلبل تک سنه مست و غزل خوان اولموشام
آغلورام هجرونده دائم گوزیاشیم قانه دونور
فرقتوندندور بئله گوز یاشی آلقان اولموشام
مه جمالون آرزو ائتدیم گورم بیر یول ولی
گورمدیم علت اودور که قلبی شان شان اولموشام
اود دوتوب غمدن وجودیم یانمیشام بیر شمع تک
خیردالوب جسمیم ز بس دللرده عنوان اولموشام
دردمندم دردیمین درمانی مولا سنده دی
عشقوون بیماریم محتاج درمان اولموشام
(سالکم) ای جان جانان سنده جانانسان منه
گل بو جانی آل دیوم قربان جانان اولموشام
- چهارشنبه
- 12
- خرداد
- 1400
- ساعت
- 21:17
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه