شامیدن گلدیم حسین قلبی یانان زینبیوم
قبرون اوستونده سنون اشک فشان زینبیوم
گورنجه قلبیم اولوب غصه دن القان یارالی
محنتوندن ائدورم ناله و افغان یارالی
غم هجرانون ائدوب قلبیمی شان شان یارالی
نجه دی یاره لرون ای یارالی قارداش اویان
گلدی مه پاره لرون ای یارالی قارداش اویان
من گیدن وقتیده قالمیشدی قوم اوسته بدنون
یاندیرور زینبیوون قلبینی درد و محنون
آلمیشام الدن اخا غارت اولان پیرهنون
سالمیشام قبریوون اوستونده ئورک داغلیورام
غملرون یاده دوشور شام و سحر آغلیورام
قلبیمی قان ائلیوب درد و ملالون یارالی
داغیلوب محنتیلن جاه و جلالون یارالی
منه خوشدور بولوسن قال و مقالون یارالی
دیله گل منله دانیش منده دیوم جان یارالی
یارالی جانیوه جانیم اولا قربان یارالی
قیل بیان زینبیوه یاره لی پیکر نجه دی
نوجوان قاسیمیلن شبه پیامبر نجه دی
گول بوغازی بیچیلن صودامر اصغر نجه دی
توختویوب اوخ یاراسی یا گنه ده قانی آخیر
یاکه عطشاندی هله زهریلی پیکانه باخیر
مات و حیران ائلیوب عالمی فتح و ظفرون
یاندیرار دللری ای شمس هدایت قمرون
سینه ن اوستونده یاتوبدور یارالی صودامرون
آغلیان وقتیده قارداش بالام ای وای دیوسن
یوخدی پیکرده باشون بس نجه لای لای دیوسن؟
وار یری امر ایلیه زینبینه شاه جهان
بو یانان قلبیمی یاندیرما باجی ائتمه فغان
قمچیلر یول یول ائدن قولاریوی ایله نهان
قبریمون اوسته بو اندازه اوتاندیرما منی
ئوره گیم یاره لیدی صبر ایله یاندیرما منی
گلشنیم باد خزانیله باجی سولدی منیم
کربلاده یارالی قلبیمه قان دولدی منیم
قسمتیمدن کفنیم پاره حصیر اولدی منیم
حالینی ایله رعایت یارالی پیکریمون
یری راحتدی سینم اوسته علی اصغریمون
یاتمیشام قبریده زینب داغیلان پیکریله
ایاقیم آلتدا یاتان اشبه پیغمبریله
سینم اوستونده یارالی صودامر اصغریله
آغلارام اکبریمه گونده اوغول وای دیرم
کسیلن حنجریله اصغره لای لای دیرم
(سالکا) آغلا منیم غملریمه صبح و مسا
یاده سال اصغریمون اوخ یاراسین ایله نوا
اوخ دگن حلقینه هیچ اولمادی دنیاده دوا
آچمامیش غنچه کیمین دهریده تئز سولدی بالام
آلتی آی عمر ایلدی آچمادی دیل ئولدی بالام
- چهارشنبه
- 12
- خرداد
- 1400
- ساعت
- 21:24
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه