گل قارداش حسین قتلگه جان سنه قربان
گل جان وئرورم باشیمون اوسته اوخی قرآن
دشمنلر آلوب دورمی گل داده یوبانما
یوخدور گله بیر کس یته فریاده یوبانما
سن گلمسن اولماز گلن امداده یوبانما
چوخ یاره ووروبلار یورولان پیکره قارداش
یول گوزلیورم دوشموشم آتدان یره قارداش
قصدیم بویودی نهری آلام مقصده یتدیم
چوخ زحمتیله نهره گیدوب سو اله گئتدیم
دولدوردوم اخا مشکی سووا بیر نظر ائتدیم
نفسیم دئدی ایچ من ولی مردانه دایاندیم
دوشدی یادیما تشنه اوشاقلاردان اوتاندیم
قولاریمی وئردیم که قالا مشک سلامت
اوخلاندی سو مشکیمده منی ائتدی خجالت
جسمیده توان یوخ منه ایلوله شماتت
گل ایندی قاچانلار قییدوب یاره وورولار
چارم کسیلوبدی ئوزون ائت چاره وورولار
داش نیزه اوقدری وورولوبدور منه قارداش
گلمور نفسیم عرض ائدم حالیم سنه قارداش
نهر اوستونه گل باخ پوزولان گلشنه قارداش
ظلمون یلی بو گلشنه چوخ چوخ اسیلوبدی
گل قارداشوون قولاری تندن کسیلوبدی
دور بریمی قارداش حسین لشگر آلوبدی
السیز بدنیم رزمیده اللرده قالوبدی
سو اولماماقی جانیمه بیر رعشه سالوبدی
قولسوز بدنیم نخلیده یاپراق کیمی اسدی
اوخلاندی سو مشکیم قالان امیدیمی کسدی
آخدی سو یره قالمادی امید داخی منده
بو قوم ستم پیشه سالوب شیری کمنده
باش یاره گوزوم یاره قولوم یوخدی بدنده
دشمن منه چوخ ائتدی جفا ظلمده دوردی
باشیم آچیلوب نوفل عمود باشیمه ووردی
باشیمدن آخان قان توکولوب گوزلره دولدی
مشکیم پارالانمیشدی گئدوب سو هدر اولدی
قطع اولدی امیدیم داخی عمروم گلی سولدی
جسمیم قالاجاقدور بولورم دام بلاده
قارداش یولومی گوزلمیون خیمه سراده
بو رسمیدی دعواده که اللر باشی گوزلر
اللر یوخدی یاره لنوب باشیله گوزلر
گوز یولدا قالوب گوزلریم الان سنی گوزلر
گل بیرده گوروم لحظه آخر سنی قارداش
چک ال باشیما مفتخر ایله منی قارداش
(سالک) نقدر یازسا غمیمدن سانا گلمز
سن گلمسن آخر غمیمی آیریسی بیلمز
قانیله دولان گوزلریمون قانینی سیلمز
گل سیل گوزومون قانین ئوزون جان برادر
بو مهلکده بلکه آدامسیز دئمه سونلر
- چهارشنبه
- 12
- خرداد
- 1400
- ساعت
- 22:15
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه