ای قلم مطلبی یاز زینب کبری آدینا
اسوه حجب و حیا دختر زهرا آدینا
غملره مونس اولان صبریده دریا آدینا
سوزومون رشته سی درد و غم و آلامیده دی
زینبین قولاری باغلی اولان ایامیده دی
ظلمیلن خیمه لری کرب و بلاده تالانیب
داغ داغ اوستن چکیلوب قلبینه غملر قالانیب
زینبین کیم دیوری کاسه صبری جالانیب
کوفه نی فتح ائلیوب شامیده طوفان ائلدی
صبری حیرتده قویوب عالمی حیران ائلدی
جان فدا زینبه عالمده گوزل مکتبی وار
دولت شاه شهیداندا بویوک منصبی وار
کربلا نهضتی پاینده دی چون زینبی وار
یتورن نهضتی انجامه اونون مکتبیدی
کربلا واقعه سین حفظ ایلین زینبیدی
هر یره قویدی قدم حق دیدی غوغا ائلدی
شهدا قانلارین عالمده بو احیا ائلدی
شامیده گلدی یزیدی نجه رسوا ائلدی
قولاری باغلی اوگون شیر زن کرب و بلا
آیاقا دوردی خانم دورده یورقون اسرا
یوزونی دوتدی یزیده دیدی حیدر قیزیام
زینبم حیدریم ساقی کوثر قیزیام
عَمْری نابود ائلین فاتح خیبر قیزیام
نطقی برّنده تر از تیغه الماسم من
غیرتون جوهریم خواهر عباسم من
گلمیشم قدرتیوی شامیده محدود ائلیم
ظلم و جورین قاباقین داغ کیمی مسدود ائلیم
هدفیم واردی که ظالملری نابود ائلیم
شیشه عمریوی چالّام داشا ای پست و پلید
چاتماسان مقصدیوه سنده جفا پیشه یزید
ایسته سم آنیده من تپراقی یاقوت ائدرم
قدرتیم واردی منیم تختیوی تابوت ائدرم
عالمی نحوه کرداریمه مبهوت ائدرم
عالم هستیده خوار ایلیرم دولتیوی
آگه اول سندیرارام قدرتیلن قدرتیوی
آند اولا قارداشیمون وئردیگی قربانلارینا
آند اولا کرب و بلانین توکولن قانلارینا
آند اولا یاسلیلارین آهیله افغانلارینا
کربلاده توکولن قانلاریمیز باتمیاجاق
پرچم نصر من الله بولورم یاتمیاجاق
بسدی ظالم بو قدر ظلمده طغیان ائلمه
خیزران وورما او باشه منی گریان ائلمه
بو یانان قلبیمی یاندیرما داخی قان ائلمه
آغلورام فکر ائلمه گوز یاشیمون عاشقیم
نقدر عمروم اولا قارداشیمون عاشیقیم
باخورام الدن آلور طاقتیمی باش یاراسی
ووروسان تازه لنور باشدا گنه داش یاراسی
ئولدورر دهریده بو زینبی قارداش یاراسی
حی داوردن اوتان ظلمده چوخ دورما یزید
اوغلی قارداشی ئولن قارداشیمی وورما یزید
بوفنادهریده.سالک.چوخ ئورک داغلامیشام
یدّی قارداشیم ئولوب باشه قرا باغلامیشام
ئورگیم یارلیدی شام و سحر آغلامیشام
کربلادن بوراجاق یولدا حسین وای دئمیشم
آغلیوب قیزلارینان اصغره لای لای دئمیشم
- پنج شنبه
- 13
- خرداد
- 1400
- ساعت
- 12:58
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه