جهاندا عاشق صادق اسیر روزگار اولماز
چکر رنج و تعب اما حقیقتدن کنار اولماز
اولار عمر شریفینده غم و آلامیلن مانوس
بلایه صبر ائدر هر دم ولیکن بیقرار اولماز
دوزر درد و مصیباته دوز عاشق عشقینه خاطر
جلال و شوکتی آرتار یقین عمرونده خوار اولماز
یانار عشقین شرارینه اریر شمعین مثالینده
دل معشوقی یاندیرسین وجودینه شرار اولماز
حقیقی عاشق عالمده دیل آچماز شکویه اصلا
اولار حق عاشقی گول تک جهاندا مثل خار اولماز
کئچر دار و نداریندن وئرر جانینده معشوقه
کیم اولسا عشقیده لایق یقینا بی وقار اولماز
مجازی عاشق عالمده دگول منظور و مقصودیم
حسین ابن علی عاشق اولوب معشوقی معبودیم
جهاندا تکدی عشقینده یقینا زاده زهرا
بوتون دار و نداریندن ال اوزدی روز عاشورا
الیکه گون طلوع ائتدی آچیلدی عشق بازاری
وئروبدور یار و انصارین گلیلی اولمادی اصلا
حسین عاشقدی معشوقی خدای رب العزتدی
بئله معشوقیلن عاشق جهاندا کیم گوروب آیا
دوشوب عشق اوسته گوداله نه اکبر وار نه قاسم وار
نه عون و جعفر و فضلی نه سقاسی قالوب تنها
ووروبلار جسمینه بسکه یارا یاره سایا گلمز
ملاقات ایلیور یارین وجودی قاندی سر تا پا
اولوبدور دستمازی قان دوشوبدور سجده عشقه
اونون راز و نیازیندن بوتون حیران قالوب دنیا
حسین راز و نیاز ایلور آتوب باشدان بو دنیانی
فنا فی الله اولوب گویا تجسم ایله معنانی
حسین لاهوتی سیر ایلور ولیکن شمر بداختر
گلوبدور مقتل عشقه الینده وار یالین خنجر
اوره گینده بودور نیت حسینون باشینی کسسون
چیخوبدور سینه سی اوسته او نادان ستم پرور
گلوب بیر آیری عاشقده او ماوایه اورک داغلی
اونوندا نیتی واردور اولا معشوقینه یاور
بیری اولموش جفا اهلی بیری آه و فغان ایلور
جفا کانی تلاش ایلور ائده زهرا گولون پرپر
حسینون باشی اوستونده کشاکشدی قیامتدی
بیری بیر ظالم دوران بیری مظلومه بیر خواهر
بیری ایستور که باش کسسون بیری اما اولور مانع
دوتوبدور تیغ خنجردن بویاندی قانینه اللر
قلم قوی پرده لی قالسین نه یوز وئردی او ماواده
فقط ثبت ایله زهرانین گولی سولدی او صحراده
اولوب جور و جفائیلن حسین دینه فدا یاندی
قفادن ذبح اولوب باشی ذبیحا من قفا یاندی
او دم شمرین جفاسیندن قرا یئل اسدی دنیاده
یاغوب گویدن شرر گویا زمین کربلا یاندی
شهادت جامینی ایچدی حسین دینجلدی محنتدن
ولی زینب غم و درده اولوبدور مبتلا یاندی
او مأوای غم افزاده بلالر مونسی زینب
غم و درد و مصیبتدن ائدوب آه و نوا یاندی
الیندن ائللری گئتدی دگوبدور قلبینه یاره
بلالی باشینه سالدی قرا اوستن قرا یاندی
نه تنها زینب کبری نه تنها عترت حیدر
او گون ظلم و جنایتدن تمام ماسوا یاندی
سوزی ختم ایله ای (سالک) اورکلر یاندی اودلاندی
حذر قیل یازما غارتدن فقط یاز خیمه لر یاندی
- پنج شنبه
- 13
- خرداد
- 1400
- ساعت
- 13:3
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه