ثبت ایلیورم مطلبیمی دفتره قارداش
تا اینکه قرائت اولونا ائللره قارداش
قصدیم بودی بو مطلب اولا پند و نصیحت
هم قادره هم قدرته هم قنبره قارداش
واردور یری سنده سوزومه ایله توجه
کیمدور چیخا من تک بئله بیر منبره قارداش
بیر واقعه دن عرض ائدورم تا هامی بیلسین
فخر ایلوری گوردوم صفری صفدره قارداش
فخریله دیور واردی منیم شاستی بلندیم
سن پای پیاده گئدوسن معبره قارداش
قالسین هله بو آیریسین آلدیم گئچن آیدا
اهدا ائلدیم نامزدیم گوهره قارداش
هر آیدا منیم یوز نئچه میلیوندی حقوقیم
سن ایشلییسن اللی مینه یاوره قارداش
دنیاده منیم سفره الوانیمه تای یوخ
سن میل ائدوسن نان و پنیر و تره قارداش
گوردوم او زمان صفدری محنتدن آلیشدی
اودلاندی منیمده اوره گیم یکسره قارداش
عرض ائتدیم اودمده صفره بسدی قولاق وئر
سن بنده سن آیا دیگورم داوره قارداش
فخر ایلمه اموالیوه دنیاده عزیزیم
اول اهل یقین فخر ائله پیغمبره قارداش
عمرون نقدر اولسادا اول خالقه بنده
اولما بو قدر بنده طلا و زره قارداش
عالمده سنون چوخدی وارون ائتمه تلنبار
احسان ائله خوشدور بیر آزین صفدره قارداش
انسانسان اگر ظلم و ستمدن حذر ایله
هی زور دئمه غمدن یورولان خیبره قارداش
من (سالکم) ائتدیم صفری حقه هدایت
احسان وئروری گونده بیلون ائللره قارداش
هر کیم اولا دنیاده اگر حقینه قانع
خندان گلر عقباده صف محشره قارداش
- یکشنبه
- 23
- خرداد
- 1400
- ساعت
- 18:54
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه