بنده ذات ازل عاشق یکتا زینب
زینت شیر خدا زاده زهرا زینب
اولوب عالمده یم عصمته بیر گوهر ناب
کنز ایمان و وفاده در یکتا زینب
گوز آچان گوندن اولوب عاشق و دلدار حسین
عشقی دنیاده ائدوب عشقیله معنا زینب
دولانوب اللی بش ایل سایه رحمتده مدام
دین اسلامه اولوب عاشق شیدا زینب
کربلاده یارالی قلبینه غم دولدی ولی
دوزدی آلام و غمه صبریده دریا زینب
گئتدی قارداشلاری الدن اورکی قان اولدی
باشینه سالدی قرا اولدی معزا زینب
باغلانوب قولاری ظلم اهلینه چون اولدی اسیر
ناقه نون اوستون ائدوب جبریله ماوا زینب
ترک ائدوب کرب و بلانی ولی چوخ حسرتیلن
کوفیه چاتدی غرض دل دولوسی محنتیلن
باخدی شهر اهلینه اول زاده زهرا زینب
کوفه نی فتح ائلسون اولدی مهیا زینب
ال چالور کوفه لیلر گوردی او بانوی حرم
بیلمورم دوزدی نجه غملره تنها زینب
اسکتو سسلدی ناگه هامونین باتدی سسی
خطبه ایراد ائلدی ائتمدی پروا زینب
دانشوب حق سوزونی کوفه ده غوغا یارادیب
دشمنین منطقیلن ایلدی رسوا زینب
سسینی درک ائلین فکر ائدوب حیدر دانیشور
کوفیه لرزه سالوب منطقی برا زینب
آتاسی حیدره بنذردی شجاعتده خانم
حیدرین غیرتینه عمروده دارا زینب
اولماسیدی بو خانم باتمیشیدی خون حسین
شهدا قانلارینی ایلدی احیا زینب
نیزه باشیندا گورن وقته حسینون باشینی
داش دگوب یاره لدی توکدی یوزه گوز یاشینی
داغلانان قلبی یانوب سسلدی جان جان یارالی
یارالی باشیوه زینب اولا قربان یارالی
سنه داش ووردی عجوزه باشیوی یاره لدی
آخدی گول صورتیوه تازه دن آلقان یارالی
باشیوون یاره لری الدن آلور طاقتیمی
یوخدی چارم ائلییم یاروه درمان یارالی
یانورام نیزه باشی مسکن اولوبدور باشیوا
ائدورم علت اودور ناله و افغان یارالی
آغلیور قیزلارون اما گولوشور اهل جفا
قلبیمی غملر ائدور گور نجه شان شان یارالی
باغلیدور قول قولا اهل حرمون ظلمیلن
شمر اولوب عترتیوه ایندی نگهبان یارالی
عجب حرمت ائلیوللر قوناقا کوفلیلر
گوروم ای کاش اولا بو کوفه نی ویران یارالی
(سالکین) قلبی بو غملرده حسین قان اولاجاق
عالم هستیده دائم ایشی افغان اولاجاق
- یکشنبه
- 23
- خرداد
- 1400
- ساعت
- 19:17
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه