دانشور طبع سخنور منزل ویرانه دن
یعنی اینکه شمعین عشقینده یانان پروانه دن
شمعی گورجک بی قرار اولدی دولاندی باشینه
آتش عشقه یانوبدور ائتمدی پروا ندن
زلفین ائتمیشدی پریشان صرصر ظلم و ستم
اولدی زلفی جان وئرن وقته گلیلی شانه دن
دوزمدی ویران سراده بلبل گلزار عشق
پرپر اولموش گل آلوب جان بلبل مستانه دن
قلبینی غملر یوران حسرتله یومدی گوزلرین
طاقت و تاب آلدی آخر زینب فرزانه دن
گوردی زینب کیمسه یوخ دردانه سین غسل ایلسون
داشدی صبری گوئیا لبریز اولوب پیمانه دن
بولمورم آخر نه کیفیتله غسلون وئردیلر
آه و واویلا اوجالدی عرشه محنت خانه دن
رسم عالمدور ئولنده کیم بو فانی دهریده
آغ گئیوب قبره گئدر بو عالم افسانه دن
بیر قرایه بوکدولر القصه یورقون پیکرین
حاضر اولدی جسمی تا قبره گئده ویرانه دن
اولمادی قبرین قازان زینب قازوبدور قبرینی
دفن ائدوبلر دینجلوب محنت فزا کاشانه دن
اوخشاما باشلاندی زینب آغلادی لای لای دئدی
چاره سیز قالدی ئوزوبدوز ال سولان ریحانه دن
باخدی پوزقون قبرینه سسلندی یات دینجل قیزیم
ای شماتتلر گورن آز سنیده بیگانه دن
(سالک) آغلار اولسا عمری هر قدر آلامیوه
دردینین درمانین ایستر سن کیمین دردانه دن
- یکشنبه
- 23
- خرداد
- 1400
- ساعت
- 19:21
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه