قاسم بن حسنین کیم آدین عنوان ائیلر
اونا مظلوم آتاسی لطفیلن احسان ائیلر
دردی اولان دوتسا اگر حضرت قاسم اتگین
بونی بیلسین کی آقا دردینه درمان ائیلر
کربلاده دولانیپ گونلر اولوپ عاشورا
اکبرین نعشی گلیپ عرشه چاتیپ واویلا
گوردوقاسم کی باتیر قانینه هر دم شهدا
عزم میدان ائلیوپ عرض ائلدی یامولا
جانینی عاشق اولانلار سنه قربان ائیلر
ویر اجازه بو زمان منده گئدیم میدانه
من یتیمم عموجان رحم ائله بو نالانه
اذن ویر قاسمه اکبر کیمی باتسین قانه
چوخلاری کامه چاتیپ منده چاتیم جانانه
سنین اذنین منه بو مشکلی آسان ائیلر
قاسمه باخدی آقا گوردی هلالی قاشینی
سای سالیپدی یوزونه یاده سالیپ قارداشینی
قارداش اوغلون آلیپ آغوشه توکوپ گوز یاشینی
بویوروپ گئتمه آنان غصه دن افغان ائیلر
نوجوان سان بوجهانی نیه باشدان آتاسان
اکبریم قانه باتیپ سن نیه قانه باتاسان
حیف دی سن گوزلیم قبریده باشسیز یاتاسان
دشمنیم گول یوزووی قانیلن الوان ائیلر
وارسفارش منه عرض ائتدی آتامدان بوگونه
دوشر اونداکی حسین ایشلری اوغلوم دوگونه
عمووی قویما کی دشمن گوره تکدی سویونه
قاسمه لطف ائله سن خدمتین اعلان ائیلر
اذن آلیپ آخیری شهزاده جهاده گیتدی
قدرت و صولتینی دشمنه معلوم ائتدی
او اون اوچ یاشدا بالا همتینی گورستدی
گوردولر قاسمی میداندا نه طوفان ائیلر
- دوشنبه
- ۳۱
- خرداد
- ۱۴۰۰
- ساعت
- ۱۸:۳
- نوشته شده توسط
- یوسف اکبری
- شاعر:
-
سید ناصر ولائی زنجانی
ارسال دیدگاه