منیم آرخام ائلیم یاریم اباالفضل
قالان قولسوز علمداریم اباالفضل
منیم یاریم علمداریم اباالفضل
قیتمز آل هاشم دوز یولوندان
گچیپسن دین یولوندا ساق سولوندان
سنه قربان آخیرقانین قولوندان
منیم غیرتلی سرداریم اباالفضل
منیم یاریم علمداریم اباالفضل
آخیر قانین سنین قارداش باشیندان
گلیر قان قانه باتمیش گوز یاشیندان
سالیر آیری سنی اوز قارداشیندان
چتین گونلرده غمخواریم اباالفضل
منیم یاریم علمداریم اباالفضل
منی آغلار قویان قارداشیم عباس
عُموردَن تئز دویان قارداشیم عباس
گوزون آچ بیر اویان قارداشیم عباس
اولوپ آشفته افکاریم اباالفضل
منیم یاریم علمداریم اباالفضل
سسین آلدیم سنین امداده گلدیم
گورنده حالیوی فریاده گلدیم
بئلیم سیندی اودی افتاده گلدیم
هامی یئرده هواداریم اباالفضل
منیم یاریم علمداریم اباالفضل
بوحال قارداش سنه قربان نه حالدی
وفالی قارداشی ، کیم الدن آلدی
سنی میدانیده بوحاله سالدی
سپهسالار درباریم اباالفضل
منیم یاریم علمداریم اباالفضل
بوقیزلارین سنیدین دادخواهی
عَموم ای وای دوتوپدی خیمه گاهی
گلیر قیز لاریمین فریاد و آهی
دیمه کی یوخدی قوللاریم اباالفضل
منیم یاریم علمداریم اباالفضل
ولائی نین ییخار قلبین غم آغلار
دوتار قارداش سنینچین ماتم آغلار
یازار نوحه آلار مندن دم آغلار
دییر ای غمده دلداریم اباالفضل
منیم یاریم علمداریم اباالفضل
- پنج شنبه
- 3
- تیر
- 1400
- ساعت
- 10:45
- نوشته شده توسط
- یوسف اکبری
- شاعر:
-
سید ناصر ولائی زنجانی
ارسال دیدگاه