صبر ایله چوخ داریخما بو روزگاره زینب
چوخدور اگر چه مِحنت گَلمز شماره زینب
هیهات حَقّ و باطل بو دَشتیده باریشسون
ششماهَه مون غمینده عالم گرک قاریشسون
اووچی وجودینه هر درد و بلا ساریشسون
رحم ائتمیوبدی دیلسیز یورقون شکاره زینب
دیلسیز بالام اَلیمده دوشمیشدی پیچ و تابه
گُل پیکرین بو چولده تاپشورمیشام تُرابه
بوش گاهواره قالدی بختی قرا رُبابه
یولاردا هَمدم اول سن اول بیقراره زینب
قان دستَمازَه حاجت واردور اِطاعَتیمده
لازمدی کُهنه کوینک وقت شهادتیمده
زهرا وئرن لباسه ایندی بو حالتیمده
وادور نیاز مُبرم اول یادگاره زینب
آردیمجا قویما گَلسون مَحزون اولان بالامی
گویده بُلوط مثالی یرده دولان بالامی
طوفان کربلاده گُل تک سولان بالامی
آفت یِتر یقینا بو گُل عُذاره زینب
بو نهضتون دَوامی اِبقا اولار سنیلن
تَرویج دین احمد اجرا اولار سنیلن
هر درد و هر مِحنده زهرا اولار سنیلن
معناده گَل قولاق وئر سن آه و زاره زینب
- جمعه
- ۱۱
- تیر
- ۱۴۰۰
- ساعت
- ۱۴:۴۵
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه