هربیرغزل که عشق اولاعنوانی خوشلارام
یارین آدیلا دفتر و دیوانی خوشلارام
طبعیم قوشی قَنادین آچوب بیرده اوچماقا
وصل عالمینده سَسلدی هجرانی خوشلارام
جَنّاته شامل اولسام اگر یاری گورمَسم
جَنّاتی نیلورم رُخ جانانی خوشلارام
چوخلار یازالّا لعل لب یاریدن غزل
من لَبلر ایچره بیرلب عطشانی خوشلارام
بوسه ائدردی فاطمه تِز تِز همین لَبی
لایلای سسینده غُصّه لی اَلحانی خوشلارام
اَرکان مَذهبیمدی حسینون گوزل آدی
من بو حسین آدیلا بو اَرکانی خوشلارام
حاشا وئرم بو رَخت عَزانی صَدارته
بزم عزای شاه شهیدانی خوشلارام
اِخلاصیم اولساشعریده گرمُحتَشم کیمی
طاها اَلیله خَلعت شایانی خوشلارام
سِیر خیالی یثربه سالّام گجه یلَه من
نِی تک سیزیلدارام گجه اَفغانی خوشلارام
باغلی قالان اُطاقلاری گوررَم خیالیده
یاننام باخاندا سینهء سوزانی خوشلارام
اکبر اُطاقینون توزونی سُرمَه ایلَرم
باغریم کول اولسا لالهء نُعمانی خوشلارام
گورم ربابی گون قاباقیندا دوتوب عزا
چَن قوزاناندا قلبیده طوفانی خوشلارام
اَسسَه سحر نسیمی اگر صحن گلشنه
گُل یاپراقیندا شَبنم غَلطانی خوشلارام
فکر ایلَرم رقیّه دی گوز یاشینی اَلور
پوزقون جمالی زُلف پریشانی خوشلارام
بوینون قویاردی چِگنینه هرگون باتان چاغی
یاده سالاندا دیده ی گریانی خوشلارام
آز قالدی(نادرا)چیخا دان اولدوزی گِنه
نوحه یانیندا نَغمهء قرآنی خوشلارام
- شنبه
- 12
- تیر
- 1400
- ساعت
- 16:52
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه