هر دَردون اولسا سَسله صدقیله یا اباالفضل
تا ایلَه سون مُداوا مشکل گشا اباالفضل
عالم ائدر تَوسُّل بو ماه بی بدیله
خوان کرم آچوبدور هر سائله دخیله
کافیدی بیر نگاهی اِفلیجه یا عَلیله
باب مرادی آچسون وئرسون شفا اباالفضل
حق نوری جلوه گردور دست کرم نمادن
اون یدی منصب آلموش درگاه کبریادن
چوخ گورسنوب عطایا بو معدن سخادن
هِچ سائلی بوش اَللی سالماز یولا اباالفضل
عباسون اَللری تک عالمده اَل تاپیلماز
سِرّ کَرامتیندن یوزدن بیری آچیلماز
اهل قلم نَه قَدری یازسا گِنه یازیلماز
هر نظم و نثریدندور چوخ ماورا اباالفضل
بالینینه گلنده اوغلی ئولن سلیمان
سَسلندی باتماباتما صبر ایله ماه تابان
سنسیز بوچولده قالدی اولدوزلاریم پریشان
سیندی بِلیم آماندور دور یا اَخا اباالفضل
اکبر غمینده اولدوم من قلبیدن پریشان
قارداش غمی چتیندی مین مرتبه اوغولدان
گوردوم سنی بو حالدا اکبر چیخوب یادیمنان
آرخام ، ائلیم ، امیدیم ای باوفا اباالفضل
آچ گوزلرون دانیشدیر ای جان من حسینی
دشمنلر ایچره باری تک قویما سن حسینی
دیندیر یامان گونونده اوغلی ئولن حسینی
قالدی اَلیم بِلیمده یوخ آشنا اباالفضل
گوز یاشینی ائدر چوخ (نادر) غمونده جاری
هر درده توش اولاندا عباسیدور شعاری
اَللر گَزن اَلوندن واردور چوخ انتظاری
بو رو سِیه غلامه سن سن آقا اباالفضل
- شنبه
- ۱۲
- تیر
- ۱۴۰۰
- ساعت
- ۱۷:۱۹
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه