شهر شامه یتیشوب صبح زمانی اُسرا
یولون اوستونده چیخوب طَعنه وِرانلار قاباقا
زینبون اَرتشی دروازه ی ساعتده دوروب
ئوز ستادینده امامیله بو شورانی قوروب
دئدی یولّار گورورَم خورداجا قزلاری یوروب
بو گون عَمّون زِره نُطق و بَلاغَت گیه جک
نَجفون شاهی علی عَمّووَه اَحسن دیه جک
چکرم نقشه ی اَهریمنه بیر نقش عَدم
یوخدی هرچند اباالفضلیم اَله آلسون عَلم
بیبوون قولّاری ساقدی هَله اولموبدی قَلم
نقطه ی حمله ده من جنگه مُهیّا چیخارام
پنجه ی آهیمیله قصر یزیدی یخارام
داخل شهره قدم قویدی خواتین گرام
اِزدحام ائتمیشیدی مَعبر اَرا مردم شام
اوردا امّا نه چکوبدور اوقولی باغلی امام
مَدخل شهریده گوز یاشلی بویوردی عَلَنی
اولمییدیم نَنَه دن کاش گورَم بو مِحنی
وردیلار نیزه لره چون شهدا باشلارینی
گوردی زینب گنه ده گورمَلی قارداشلارینی
نظره آلدی تماشاچی لَرون داشلارینی
مُتَّفق ایله میسوز سیز دئدی یولداشلاروزی
آتیسوز باری آتون زینبه بو داشلاروزی
غملری وئردی منه گرچه بوگون پای بولَنیم
هچ دئمزدیم بو قَدَر شامیده اولسون گولَنیم
واردی بو قافله ده قارداشی ، اوغلی ئولَنیم
رشته ی صبری نوامیس خدادن قیریسوز
یاره اوستن گنه دَه بیزلره یاره وریسوز
اَلغرض شهری گَزوب قولّاری باغلی اُسرا
چکدی قصرین یولونا قافله نی شمر دَغا
قصد ائدوبدور که اَزل رَاس حسینی آپارا
تَله سوردی ئوزونی بزم شیاطینه قاتا
ساتدیقی دینه گورَه دِرهم و دیناره چاتا
یاره لی باش دالسیجا گئدوری اهل حَرم
گنه ده غم غمون اوستن یازوری کاتبِ غم
بِله چرخی گوروم اولسون که گرفتار عَدم
گردش کَج روشی قلبلری قان ائله دی
فاطمه سوگُلی سین گور کیمه مهمان ائله دی
قصر خَضرا سالوری حیرته هر بیر گورنی
یِدّی تالار او یره واردی گزارش وِئرَنی
غُرفه لَر رنگی یاشیل ، کُنگره لر یاسَمنی
آسلانوب کُنگره لردن یره گُللَر بُداقی
سوسن و نسترنون پایه لر اولمیش دایاقی
آلتی تالاری او قصرین آچیلور بیر بیرینه
تا که مُشرف اولا تالاریلَرون آخرینه
باب سیمین آچیلور تخت یزیدون یرینه
دوره ده کرسی اِجلاسی دوزولمیش زَر و عاج
اوتوروب تَختیده هِند اوغلی باشیندا ساری تاج
طشت زر اَلده اولوب حاجِبِ مخصوصی عیان
احترامیله قویوبدور یره طَشتی او زمان
ئورتوگون رَد ائله دی گورسَنه خورشید جهان
ساغر می اَلینه آلدی زنازاده یزید
چوخ حقارتله باخوب طَشته او نامرد پَلید
دئدی شادم گنه ده عیشیمه فرصت گورورم
بوتراب اوغلونی چون غرق مَذَلّت گورورَم
پای تَختیمده اونی ایندی بو ساعت گورورَم
مجلسون عیشینی سیز حِدّ کَماله یتورون
اهل عیالین قولی باغلی بِله بَزمه گتورون
دوشدی حاجِبلره فرصت اَله قَمچی آلالار
آل یاسینی همان مجلس شُربه سالالار
تیتریوردی آنالار ، آغلاشور امّا بالالار
قمچیلَر زوزه سی زهرا ئورگین داغلادیلار
هر قَدمدَه بالا قزلار یخیلوب آغلادیلار
ای قالان دَربیلَه دیوار آراسیندا بَدنی
سوز یتیشدی بو یرَه گَل ائله مَاذون منی
وِئر اجازه قَلمیم ثبت ائله سون بو مِحنی
دعوت ایلوم سنی قوی ئوز قیزووُن روضه سینه
بالا وای نالووی قوش سنده بو جَمعین سَسینه
آلتی مینجی قاپونون حاجِبی بیر کافَریدی
بَدریدَن یاره لی هم کینه وَر خیبَریدی
دشمن بَدسِیَر احمد و هم حیدریدی
نچه ایل منتظریدی اَله مَنظوری گَله
انتظاری باشا چاتدی یتیشوب ماحَصله
اَلینه آلموشیدی غیضیلَه بیر چوب سِتم
اُسرا ایچره گوروب زینب عُلیانی او دَم
قسمتیم اولمادی افسوس دئدی جنگه گِئدَم
عیبی یوخدور عوضین منده بو یردَه چیخارام
بوتُرابون ائوینی ظلمیله ایندی یخارام
شَل اولان پنجه سی قالخوب آغاجا وئردی تکان
چوخ مناسبدی بو سوز اولسا اشاریله بیان
سنده قوش نالووِی زهرایه بو سوزده اوجادان
ظالمون ضَربتی باخ گور هدف ائتدی هارانی
مَحملون یاره سی اوستن گِنه وِردی یارانی
ائله بیل ناوُک خامه اوخ اولوب قلبی دَلَر
باش یارانلار بو سوزون جوهَرینی یاخشی بیلَر
یاره اوستن یارا نیلَر ، یارییا یاره گَلر
امر مشگلدی بو غم سَنجش و مِعیاره گَله
عَمّه وای سَسله دی سَجّاد آلوب عَمّامه اَله
زینبون دوره سینی آلدی بَنات عَلوی
آز قالور عَمّیه هر تک تکی اولسون فَدَوی
ناله دن لرزیه گلمیشدی او قصر اُمَوی
بیری ئوز دردین او دَم حیدر کراره دیور
بیری علقمده یاتان قولسوز علمداره دیور
بیری سَسلور عمو قالدوق نَه یامان گونلَره گَل
او مبارک نظری سال بو سِینان لشگره گِل
سنی امید بیلنلَر اُل آتوب مُعجره گُل
سو سوزون یوخ دانیشان رَسم حیا گوزلَمه گَل
بیزه خاطر دئمورَم ، رحم ائله بو عَمّه مَه گَل
شامه گَلسیدون اگر کامَه چاتاردوق هامومیز
اشک شوقی بِله گوز یاشه قاتاردوق هامومیز
سایه سینده قولوون بیردَه یاتاردوق هامومیز
ماه یثرب نظر ائت دورَه دَه اولدوزلارا گَل
یاور اول دشمن ائوینده بو آدامسیزلارا گَل
قمر هاشمی ای منبع ایمان و شرف
اولدی ایستکلی باجون شِش پَر آلامَه هدف
قوجالان عَمّه مَه باخ سال یولووِی شامه طرف
رشته ی عمرینی آز قالدی جفا تیری بولَه
گلمه سون قورخورام آخر بی بیم اَللَرده ئولَه
ای مبارک آدینا دیللَر اولان اَزبر حسین
(نادر) عشقیله گلوبدور قاپووا نوکر حسین
دَم آخرده بیلورسن که سنی گوزلَر حسین
ای سلیمان گتوروب پای مَلخ مورَه پای آت
اَوّلین لِیله ی قبرینده اونون دادینه چات
- شنبه
- 12
- تیر
- 1400
- ساعت
- 17:38
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه