حضرت خَتم رُسل سیّد اولاد بشر
چکدی اسلامه گوره زحمت شایان نَقَدر
نِچه مدّت ئوزی اصحابی ئورکدَن یارالی
شِعب بوطالبیده قالدیلا اِئلدَن آرالی
گونده بیر تازه ئولَن ماتمینه آغلادیلار
آج قالان بَطن لَره چوخلاری داش باغلادیلار
بیر گونی دامنه ی شِعبیده اول فَخر بشر
ذکره مشغولیدی خَلوتده ایکی دیده سی تَر
صف اَصحابیدن آشفته بیر عورت نِگران
مَحضر پاک رسوله یتیشوبدور او زمان
آغلیا آغلیا عرض ائتدی اَیا میر زَمن
دولانوب حال خدیجه یتیش امدادینه سن
دوردی تَعجیلیله اَثناده او حضرت اَیاقا
دامن شِعبی اَنوب سرعتیلن تِز اَشاقا
آیریلیق دردینه تِز گلدی طبابت ائلسون
یار و غمخوارینی بسترده عیادت ائلسون
گوردی آسوده یاتوب مَحرمی اول کانِ وفا
دیزی اوسته باشینی آلدی امیر دو سَرا
دئدی ای یار وفاداریم اویان یاتما بِله
آیریلیقدان دئمه گرداب غمه باتما بِله
ای یامان گونده منیم هَمدم و یاریم گوزون آچ
سَنیدون اِئلده منیم شَان و وِقاریم گوزون آچ
شوقیلن ای جَبَل النّوری چیخان گونده باشا
گَتورَن غار حَراده من ایچون آب و غذا
نیَه سس وئرموسن ایندی سَسیمه آچ گوزووِی
نطقه گَل دردووِی دئ فاش ائله گیزلین سوزووِی
ایندیدَن تِزدی قزون فاطمه قالسون نَنَه سیز
اوچ یاشیندا باشینا قارووِی سالسون نَنَه سیز
گور نجه اَللری قوینوندا باخور یاتماقووا
چَتین اَیّامیده کاشانه میزی آتماقووا
طوی دونی فاطمه نون قسمتی اولسا گِینَه
نجه سن سیز یولا سالام اونی بَختین ائوینَه
نَنَه سیز قز گولَه بیلمَز ئورَگی غمله دولار
نَنَه سی اولمیانون ، مَجلسی نِسگلیلّی اولار
نَقَدر سَسلدی طاها اونی ، آلموبدی جواب
اشک حسرتله او مولا ئوزونی ائتدی مُجاب
کفن ایلوبدی عَباسین او زمان همسرینه
ئوز اَلیله اونی قویدی اَبدی بسترینه
کِچدی ایللَر سوزی کوتاه ائدیم اهل سُخنه
قسمت اولدی گینَه طوی دونی زهرا بَدنه
اَندیلَر فوج مَلکلَر یِره گویدن او زمان
گوشه دامنینی ساخلادی نِسوان جِنان
حوریلَر دسته یلَن مَنزل طاهایه گلوب
سَرمَگه ساچلارینی مَقدم زهرایه گلوب
اولدی داماد نَبی شمس درخشان وِلا
ساق صولوندا صُلحا گلدی علی شیرخدا
آلدی طاها بیر اَله ضیغَم داوَر اَلینی
بیر اَله کَنز حَیا ، زُهره ی اَطهر اَلینی
اَل اَله وئردی ایکی نَیّر تابانی او دَم
مرتضایه بویوروبدور بو سوزی میر اُمَم
گَنج عصمت سنه خالق ائدوب اَرزانی علی
جان سنون جان بو قزیم فاطمه نون جانی علی
گر خموش ائتسه اَجل شمع شبستانی علی
قیترَرسَن ئوزومَه بیر گجه پنهانی علی
وقت او وقت اولدی گَلین خانه ی داماده گِئده
حِجله ی بَخته ایکی گُل ایکی دلداده گِئده
راوی اَسمادی که نقل ایلیوری بو سُخنی
فاطمه دوشدی یولا قالدی رسول مَدنی
قالخیزوب اَللرینی ایلدی زوجینی دعا
یولا سالدی هامونی لیک ئوزی دوردی قاپودا
تکیه دیواره ائدوبدور اِئوه گلمور اَیاقی
گوز یاشین جاری ائدر اوغلی ئولنلَر سَیاقی
دئدیم ای میر هُدا صاحب اوصاف جَمیل
طوی گونی آغلاماقا هانسی قَضایادی دلیل
ائتدی فرمایش اودَم، حالیمی اَسما گوروسَن
گئدوری بَخت ائوینه بَضعه ی طاها گوروسَن
نَنَه سی اولمادی وِئرسون ئوزی زینت طویونا
حیف اولا گوز دولوسی باخمادی زهرا بویونا
بیرده بیر اَمر مَزید اولدی منیم مُشگلیمه
نِجه ایندی قَیدیم فاطمه سیز مَنزلیمه
بو گجه صبحه کیمی دیلده سوزوم اوخشامادی
فاطمه گِئتدی اِئویمدن اِئویمون گِئتدی دادی
گر سلیمان قاپوسی پای مَلخ اِئتسه قبول
لطف ائدر (نادره) حتماً ئوزی زهرای بتول
- شنبه
- 12
- تیر
- 1400
- ساعت
- 23:9
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه