کیمدی یارَب گورَه سن ظُلمته چون نورگلور
بَدر کامِلدی ویا مَشرق اَرا هور گلور
یا که سینادن آشوب دشت غمه طور گلور
مَه جَبینیلَه او زُلف سِیهی جور گلور
هم فُروغ سحری هم قَره دِیجور گلور
کیمدی الله بو گَلنده ئورَگه شور گلور
کیمدی تَشبیه اولا گَر ماهَه وِئرَر ماهَه شرف
اَگری شمشیرلَره خنجری قاشلاری طَرف
اوخ آتان اولدی ئوزی اوخ کیمی مژگانه هَدف
لَعل لب ایلوری یاقوت و عَقیقی چو خَزَف
دوزولوب یان یانا دندانیلَری مثل صَدف
طُرَّه لَردن تَری گُل عارِضَه مَعطور گلور
کیمدی میداندا دوروب باشینه میدان دولانور
یِریشینده ائله بیل کَبک خُرامان دولانور
باخیش ئورگَنمَگه اطرافینه جیران دولانور
سَهم وصولَت دِئمه بیرسَهمِلی اَصلان دولانور
اِئتمه تَمثیل وُحوشه، گوزل انسان دولانور
فَتَبارَک دیَه نون اَمرینه مَنظور گلور
بو مَلَکدور گورَه سَن یابَشرستاندا بَشر
شاه مِصری رُخیلن کِیش ائلیوب ماتَه چَکر
مین زُلیخالَر اونون حُسنینه آواره گَزر
باخسا گر کُنج لَبه ذوقیله هَر اهل هُنر
خال آدیلان اَکیلَن دانهء اِسپندی گورَر
بَدنَظر باخسا نَچونکه باخیشی شور گلور
گورسَه مَدهوش اولاجاق عاقل و دیوانه اونی
بعضیلَر اوخشادوری یوسف کَنعانه اونی
فرض ائدور چوخلاری پیغمبر رَحمانه اونی
دئدیلر کیمدی ،قَضا چَکدی بو میدانه اونی
یا قَدَر ایستَه دی تَحکیم اِئده قرآنه اونی
عادیاتیلَه ضُحی، فَجریلَه اَلنّور گلور
جَنَّتون سیدی گویا بودی دنیاده گزور
یا قیامَتدی نَبی مَحشر کُبراده گزور
بَشَرون کَیف بَشر وادی اِسراده گزور
رَف رَف اوستونده دی یا کرب ومُعلاده گزور
یا اونون اَشبَهیدور ایندی بو غوغاده گزور
بیر بِله خِلقَته خاتم ئوزی مَسرور گلور
دانیشان وقتیده هولَفظی اونون کَلمَه سیدور
بله فرض اِئتمه مَلَکدور که یِره گَلمَه سیدور
گَردِ نَعلینی مَلَکلَر گوزونون سُرمَه سیدور
کیمدی بو اهل سَمادَن خَدَم خیمَه سیدور
نَوهء فاطمه دور زینب اونون عَمَّه سیدور
می خَمّار اَزلدن اودی مَخمور گلور
علی اکبردی آدی بنده دی تک داورینه
بَند دلدور بو جوان زاده ی پیغمبرینه
کیم اونا باخسا باخور خَتم رُسل مَنظرینه
حق نماسی یایوری نورینی دور و بَرینه
زِره اوستن کَفنی اورتوک ائدوب پیکَرینه
هم تماشایه سلیمان گلور هم مور گلور
سَروِیده یوخ بله بیر قامَت موزون عَجبا
باخجاقین قَدّینه خیاط اَزل بیلدی روا
تا بیچه قامت رَعناسینه بیر قانلی قَبا
گورسه بو قامتی گر اهل صَلاتیله دعا
اونا بی شبهه اولار معنی قَدقامَت اَدا
پیکر قُدسَه گِینموش زِره نور گلور
- یکشنبه
- 13
- تیر
- 1400
- ساعت
- 16:44
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه