ای بشر فکر ائله گور کیملَره دنیا قالاجاق
بو قَدَر دَبدَبه لَر گئتملی دور یا قالاجاق
حشمت و جاه سلیمانون هانی بیر اثری
هانی اسکندرون آثاری کیمون وار خبری
تخت جمشیده نَه گلدی هانی پرویزلَری
کُلّ مخلوق فنادور ئوزی یکتا قالاجاق
بوجهاننان هامی بی چون وچرا گئتملیدی
آقیلان قاره ، عَوام و عُلما گئتملیدی
اَغنیا و فقرا ، شاه و گدا گئتملیدی
فانی دنیاده نَه ساغر نَدَه صهبا قالاجاق
سُرمِهء غفلتی پاک ائت آیق اول آچ گوزووِی
بِش گونون لذّتینه سالما بلایه ئوزووِی
گَل بیر ایش گور دانیشان وقتیده هرکیم سوزووِی
خیریله یاد ائله سون چونکه بو معنا قالاجاق
سانما رُستملره بو قدرت بازونی قالا
اَلِفِ قامت سَروی چوخونون دوندی دالا
آلا گوزلَر آخینار، رنگ دوشَر حالدان حالا
صورتین رنگی سولار سیرَت زیبا قالاجاق
قاره تپراقلارون آلتیندا یاتان وقتی بَشر
مونسی اوندا اولار یاخشی یامان خیریله شَر
توشه ی عشق او زمان مَنزل عُقبانی بَزَر
عشقه بیگانه اولانلار نجه آیا قالاجاق
شمعیدن بو سوزی پروانه گجه آلدی خبر
منی آزقالدی اَیاقدان سالا بو سوزو شَرَر
نَه حالا سن قالاجاقسان دِئ گورَم اولسا سحر
صُبحه بو شعله ی رَقصانیده یارا قالاجاق
اِئشیدوب تا بوسوزی شمعین اولوب اشکی روان
رقص اَنواریله پروانیه تِز قیلدی بیان
عشقه ای بَذل ائلین شوقیله سرمایهء جان
سن گئدنن صورا شمعی بِئله سانما قالاجاق
گردش چرخی دیوم واقف اول ای خَسته بَدن
گجه چاتماز باشا امّا دونه جَکسن کولَه سن
صبح اولان وقتی یاخوللام بیلورم تپراقا من
گجه نون واقعه سی صُبحه مُعمّا قالاجاق
گون چیخان وقتی هامی شمعیله بیگانه اولار
اَنجمنده داها نَه شمع و نَه پروانه اولار
سوزومیز مَحفل اَرا دیللَره اَفسانه اولار
سنله من گئتملیوک عشقیمیز امّا قالاجاق
سوز دوشوب عشقیدن ای خامه سوزه حاشیه آچ
بیر نشان اَدبی سینهء دیوانووَه ساچ
کوی عِرفانه گنه سال یولی تعجیلیله قاچ
شب پَریله نَه ایشون قافیده عَنقا قالاجاق
عشقین اَرکانی مُسلّم که علینون آدیدی
اول و آخر قرآنیمیزون هر زادیدی
زاهدا بیل بو علی صوم و صَلاتین دادیدی
فانی و باقیده والله بیزه مولا قالاجاق
مُدَّعی گور نجه دین پیکرینه وِردی ضَرر
عُمریلن مَحَکه حیدر کرّاری چکر
گوهر نابیلَه خَرمُهره برابردی مگر
گوهری باخسا بیلر هانسی هایاندا قالاجاق
(نادرون) کیمدی یامان گونده که اولسون دایاقی
نگران اولماز اگر اولسا علینون قوناقی
کیمده وار حُبّ علی قبری اولار طوی اُتاقی
هول محشرده اونون قِیدینه مولا قالاجاق
- یکشنبه
- 13
- تیر
- 1400
- ساعت
- 16:54
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه