یازیلوب عشقین آدی عَرشه وریلمیش عَلمَه
کیم اونی دوز اوخوسا دوز گَله جَکدور حَرمَه
عِینی اول عِینیدی تک یارینه بینا اولاجاق
شینی شَهپردی اوچان قوشلارا یارا اولاجاق
قافی اول قُلَّه دی که عاشقه مَاوا اولاجاق
عشق زنجیرینی یار عاشقینه باغلیاجاق
باخسا بعضی گوله جَک بعضی لَری آغلیاجاق
هَرَه ئوز معرفتیلن سوزه آگاه اولاجاق
بیری دوز یول گِئده جَکدور بیری گُمراه اولاجاق
بیری گوزدَن دوشَه جَکدور بیری دِلخواه اولاجاق
اَمرِ واضِحدی بو سوز من نجه مُحکَم دئمه رَم
عشقه بیگانه اولان جاهِله آدم دئمه رَم
بیزلره حضرت حق یولاری هَموار ائله دی
کربلا شاهینی عُشّاقه ئوزی یار ائله دی
بیزی دلداده بَگندی اونی دلدار ائله دی
روضه سی اِئودَن اِئووَه شور ونوا گَتدی بیزه
صود وئرنده نَنَه میز عشقیده ئورگَتدی بیزه
جان فدا ایلیروک بیز نَنَه نون گوز یاشینا
گوهر دامَنینی وِرمادی غَفلت داشینا
او بیزی ایلَدی پروانه بو شَمعین باشینا
ائوون آباد اولا ای عشق ائوین آباد ائلین
قَرَه بیر کوینگیلَن فاطمه نی شاد ائلین
روضه بزمینده صوده گوز یاشینی قاتدی نَنَم
گوز یاشین دادیم اواَثناده که دوش وئردی اَمَم
طوی دونون سائله احسان ائلین ائتدی کَرم
اوغلونون دفترینه یازدی حسینچی آدیمی
مُعتبر ائتدی بو آد عالم اَرا هَر زادیمی
صودیلن صوداَمرین چون سوزی گَلدی آرییا
ایستیور خامه توسّل ائده بیر آی پارییا
سوزی گور دایرهء قسمتی چَکدی هارییا
مطلبین نِسبتی وار گونلَر ائوینده قالانا
بوش بشیک تَرپَه دَنه اصغره لایلای چالانا
گجه گوندوز نَنَه سی گونلَر ائوینده مَلَه دی
توزلی رُخساره ئورک قانینی گوزدَن اَلَه دی
گون قباقینده سَروب بوش بَلگی هِی بَلَه دی
هِی دیردی منی مین دَرده دُچار ائتدون علی
آلتی آیدان صورا مندن کوسولی گئتدون علی
گون باتان وقتی علی صبرو قراریم آزالار
یره قاننان ائله بیل اهل سَما پَرده سالار
یا مَلکلر الینه قرمزی بیر دوشلوگ آلار
ائله بیل اهل سَما هالهء غمدَه قالوری
اوندا بیلّم که سنه فاطمه لایلای چالوری
مرغ کوکویه منیم نوحه می ئورگتدی فَلک
دود آهیم اَریده صَخرهء صَمّانی گرک
جانیمون مِجمَرینه عود اولوری قانلو بَلک
حسرتیم واردی گلوب بیر دانیشا منله بالام
باخا احوالیمه شاید ، باریشا منله بالام
حکم تقدیریله یار اولدی منه دست قضا
بیر گجه عالم رویا سنی گوردوم،عجبا
دیل آچوب خوش دانیشاردون بله گلدون یوخوما
سینَمون عُقده سینی غَمزیلن آچدون علی
مُحسنیله اَل اَله جَنّت اَرا قاچدون علی
دئدون آز آغلا نَنَه ، اولما بالوننان نگران
دئدیم آخر گوزلیم فکرون ائدر باغریمی قان
گجه لَر ایندی بشیک تَرپَه دنون یوخدی گمان
دئدون آز قِیدیمه قال،قِیدیمه چوخلار قالوری
یوخومون وقتی رُقیَّم، منه لایلای چالوری
(نادرا) اصغرین آدین گِنه چکدون رَقمه
ایسته بو یرده نظر هم ئوزووه هم قَلمه
بیر نظر بسدی یتورسون سنی تا مُحتَشمه
مال دنیادن اَل اوز باغلاما بِل سیم و زَره
غرق دنیا اولانون هَر نَه ئی گئتدی هَدره
- یکشنبه
- 13
- تیر
- 1400
- ساعت
- 22:28
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه