کرب و بلا بو یر یوزینون افتخاریدی
زهرا عزیزی شاه شهیدان مزاریدی
واردور سوزوم بو کرب وبلایه گئدنلره
ششگوشه قبری قصد زیارت ائدنلره
عطشان حسینه سوزیله نوحه دینلره
اوردا پیمبر اوغلی ،غریب وطن یاتوب
آتلار ایاقی آتدا اَزیلمیش بدن یاتوب
اوردا مدام انس و ملک سینه داغلیار
کیملَرگورون حسینه او یرده قان آغلیار
روح الاَمین گلنده اورا قاره باغلیار
باشین آچار اومقتلی گورجک اَبوالبَشر
حوّا یانیندا باشلیار ایوای اوغول دیر
مقتلده آیری شوره گلر هر نِکو سِیَر
نوح نَبی آچار باشینی یا حسین دِیَر
ابراهیم اوردا ذبح عظیمه قرا گِیَر
موسی اَلینده داد و فغانه عصا گلر
سینه ورار ، همان یره روح خدا گلر
ختم رسالتون ئورگی اُول مکانیده
باشی یارالی شاه نجفده فغانیده
عاجز قالار قلمده بو شرح و بیانیده
پیغمبرون قزی او یره نوحه خوان گلر
آغلار گوزیله مقتله صاحب زمان گلر
زهرا گلنده شام غریبانه مقتله
وئردی حسینیله نِجه اُول یرده اَل اَله
خِیرالنّسایه چوخ چتین اولدی بو مَرحَله
اولدوز کیمی بو یاره لرین یوخ دئدی سانی
فاش ائت اوغول اومن توخیان کوینگون هانی
اولدی بو قان تَبَرّک اوغول گوگلره گئدر
بیرقطره سن آخان قانووی ائتمدون هَدَر
گوداله باخ که تخت سلیمانه ناز ائدر
صبرین بهاسی گرچه اولان سوز و سازه دور
علت ندور که بارماقوون قانی تازه دور
دشت بلانی ایندی گرک کربلا ائدم
آق زلفیمه روادی بو قانی حنا ائدم
نی تک سیزیلدیام بوچولی نینوا ائدم
حشره کیمی بو ماتمه اَشکین اَلَر نَنون
سن یات بالا مزارووَه هرگون گلر نَنون
زینب یولا سالاندا سنی خیمه گاهیدن
تنگه گلوبدی سینه سی اُول دود آهیدن
زلفی آغاردی لحظه ده آخر نگاهیدن
مَرکَبدن اَنمگه بیلوسن چکدی نازووی
یافاطمه دئدی صورا ئوپدی بوغازووی
منده یول اوسته غملره غمنامه باغلادیم
بو روزگارین ایشلرینه سینه داغلادیم
زینب دینده نوحه سنه منده آغلادیم
تقدیر اَلی یازوبدی که عشقین طاقین گورَم
بو باجی قارداشین بِله آیریلماقین گورَم
میدانه راغب ایلدون اوندا که مَرکبی
سرگشته اِئتدون عشقیله بو قانلو مَکتبی
قویدون اَلی ئورکده یولون اوسته زینبی
بو گِئتمَگونله قلبینی بِالمَرّه یارموسان
جسمی قالوبدی خیمه ده جانین آپارموسان
یوز دوندروب مدینیه ائتدی بیان منه
یا فاطمه بالون گئدوری ایش قالوب سنه
گَل گور نَه حاله قالمیشام ای باغریقان نَنَه
(نادر) قوتار ، قریحه سوزی گور چکور هارا
خامه دونوبدی بیر اوخا قلبه ورار یارا
- سه شنبه
- 15
- تیر
- 1400
- ساعت
- 21:40
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه