اصغــــر آقام حُسینچیلرون افتخاریدور
شَانی گـــوزلدی شیعه لرون اعتباریدور
گرچه آدی کیچیکدی،بُویوک امتیازی وار
عَلّامــــه لر،بو ســـروره دستِ نیـازی وار
اهل ِ جنانـــه ، بو بالانون ،فَخرو نازی وار
شیعه ایچینــــده پَرچــم پُر اِهتِــزازی وار
عاشقلــــرون صفــــای دل بی قراریدور
غِبطـــه ایدلَّلر حـــور و ملائک ،مقامینه
لَبِّیک،سسلـــنوبـدی بـــالا اوز اِمـــامینه
هر ایلـــــده اربعینـــده گیدلَّــر سلامینه
حیرتــــده قویــدی اهل جهانی مرامینه
اصغــــر قـــــانی دیــار بلا اقتداریدور
ششماهه نون گوزل آدی زینتدی پرچمه
سروردی بیزلـــــره و همــــی کُلِّ عالمه
کوثردی بو ، نه حاجتـــی وار نهر علقمه
طفل حُسیندی زیور اولوب عرش اعظمه
عاشقلرون نگاریـدی ،هــم شهریاریدور
اصغردی لیک ،مَنزِلَتی چــوخ کَبیریدور
شاهلار گدادی درگهینه ، بــو ،اَمیریدور
دلبر لر ایچره بو بالا چــوخ بی نظیریدور
هر دردون اولسا چاره قیلر ، چون خَبیریدور
جَنَّتده ، مُحسنـون بو بالا هَمجــــواریدور
گورسَـــه اگر جَمالینی آی شَرمسار اولار
یوسف گوره بو دلبــری چوخ بی قرار اولار
فَصـــل خَزان ایشیتسَه آدین نو بَـهار اولار
کیم بو چــکه بو غُنچه نی بی اختیار اولار
چون عاشــــق حَقیقیِ پَــرور دِگاریدور
اصغردی عَطر و بوی گُل یــاسی وار بونون
بابَ الحوائــج آدیــدی اِحساسی وار بونون
کانِ سَخا عمـــوسیــدی ،عباسی وار بونون
اربابیمیز حسیــن کیمــی بابا سی وار بونون
خَلّاق عالمــــون بو گــوزل شاهکاریدور
روز بــــلاده سـوز عَطشـدن اولوب کبـاب
یاتموبدی صبحه جک آناسـی حضرت رباب
هی سسلیور صباحه کیمین ایلـه صبرو تاب
بلکه عمون فراته گیدوب مشک اولا، پُـر آب
اهل حـــــرم بو غمده گوزی اشکباریدور
الله شب بــــلانون عجب مــــاجــراسی وار
چون حضرت ربـــاب اورگینـــــده نواسی وار
اصغر سوسوزدی ،خیمه عجب غم نمـاسی وار
لای لای دیور رقیه ، اورکــده عــزاسی وار
زهرایــــــه بَنـــــذرون ،بـــوبالا دلرباسیدور
هی سسلیـــور آنـــــاسی او بـــانوی بــاحیا
ایت استراحت ای گــــل گُلـــــزار کربـلـا
دیناخلاما منیم سینمی یــــوخ صودوم بــالا
قوی غم گیجه قوتارسون علی تا که صبح اولا
قانــــه دونیدی ســو نه عجب روزگاریدور
ویرم سنــــی قســـم آقــا ، جَدُّون پیمبره
زهــــرای اَطهـــــره ،هَمیـــده شیر داوره
کَربُ بلاده قلبــــی یــــانان ،غملی مادره
یازدی بــــو شعــری ایله عنایت بو نوکره
(پویا)گـــوزی غمینـده چو اَبر بَهاریدور
- پنج شنبه
- 17
- تیر
- 1400
- ساعت
- 10:48
- نوشته شده توسط
- یوسف اکبری
- شاعر:
-
احمد پوریا
ارسال دیدگاه