فدا اولوم گوزوه انتظاروام تیز گل
دونوبدی قانه گویول بی قراروام تیز گل
انیسیم آهئدی بو گوزیاشیم منه مونس
یوخومدی هجره دوزوم، اشکباروام تیز گل
شراب وصلویله مست ایلدون گیتدون
ترحم ایله دوباره خماروام تیز گل
گجه گونوز بودی فکریم ایاقون آلتندا
فدا بو جانی ایدم جانثاروام تیز گل
سنون یولوندا باشیم داره گیتسه لا دیمرم
سنه فدا من اولوم یار، یاروام تیز گل
سنون‌همیشه آچوقدور او خوان احسانون
منیده دعوت ایله، ریزه خواروام تیز گل
یاخوندی درد فراقون منی هلاک ایلیه
علاجی سنده دی، بیمار زاروام تیز گل
نَیَم سنونکی ام ای گل لره اولان زیور
گلون یانندا اولار خار، خاروام تیز گل
گئجه صباحه کیمی نی کیمین نوا ایدرم
گورم جمالوی چشم انتظاروام تیز گل
سیزون مقاموزا لایق الیمده بیر زاد یوخ
فقیر در به در و شرمساروام تیز گل
سلوک عشقده ای یار مرشدیم سنسن
گدای خاک نشین دیاروام تیز گل
گل ای نگار قدم قوی بو گوزلریم اوسته
ایاقوه دوشنیم، خاکساروام تیز گل
ایاقلارون توزونی کیپریگیمله پاک ایدرم
رقیبلر گوره خدمتگزاروام تیز گل
ویروبدی حافظی یعقوبیه ادب درسی
بقیع ده دیه بیر انتظاروام تیز گل
- جمعه
- 1
- مرداد
- 1400
- ساعت
- 21:1
- نوشته شده توسط
- یوسف اکبری
- شاعر:
-
حاج حسن یعقوبی تبریزی
ارسال دیدگاه