فراق یار الهی منی فشاره سالوب
شرار عشقی ایله قلبیمه شراره سالوب
قمار عشقیده مغلوب اولوب کنار اولدوم
گلوب بساطنی قوردی گینه قماره سالوب
بو یولادا مال و منالیم گیده دا بوشلامارام
اورکده گیزلین اولان عشقی آشکاره سالوب
نجه گزر گونون آردینجا آی گجه گوندوز
منی دالینجا او مهپاره کوهساره سالوب
نقدر یالوارورام رحمه گلموری نیلوم
بو تنگ سینه ده روحوم قوشون حصاره سالوب
آیین نجه گورونر نصفی گر بولوت توتسا
ویروبدی شانه قرا زلفونی عذاره سالوب
نقدر جهد ایلدیم سر عشقی گیزلتدیم
فغان و داده گتوردی بو سری جاره سالوب
یارالی صید مثالی او گوزلری شهلا
سالوب کمنده، چمندن ولی کناره سالوب
سنق نِیین مَثَلی عرشه اوج ایدور نالم
گوروشموری گوزومه، قاره روزگاره سالوب
یانور بیر عمرودی یعقوبی آتش عشقه
بو نار عشقه ازلدن او ماهپاره سالوب
مسبب عشقیدور عشاق ایچینده مشهورم
نگار لطفودی خلق ایچره اشتهاره سالوب
- جمعه
- 1
- مرداد
- 1400
- ساعت
- 21:2
- نوشته شده توسط
- یوسف اکبری
- شاعر:
-
حاج حسن یعقوبی تبریزی
ارسال دیدگاه