اي دليل خلقت كون و مكان يا فاطمه
خلقتین بطنیندکی سر نهان یا فاطمه
راز خلقت اولمامشدی بدو خلقتدن پدید
سنله اولدی برملا عالمده ای فرد فرید
اولماسیدون عالم امکان اولاردی ناپدید
سن سبب اولدون یاراندی کهکشان یا فاطمه
جلوه سین کسب ایتدی سندن خلق خلاق ودود
ظاهر اولدی بیر بیره عالمده خلق اولموش وجود
ای وجودی باعث ایجاد هر بود و نبود
حشمتی جاه و جلالی بیکران یا فاطمه
گوهر خلقت سنی خلق ایتدی خلاق احد
خلقتونده ایلدی اعزاز اللهُ صمد
کل مخلوق ایستیر روز جزا سندن مدد
سسلیر انفاس عالم هر زمان یا فاطمه
تا وجودین خلق اولوندی عالمه قویدون قدم
اون بیراولدوزایلدون ظلمات دنیایه علم
هر بیری مخلوق آرا صاحب مقام و محترم
وصفیوه اللرده خامه نا توان یا فاطمه
باطینینده خلق اولوب روز ازل حسن جمیل
هر ایکی دنیا ده فخر ایلر سنه نسل خلیل
رحمتی جوشه گلنده خلق ایدوب رب جلیل
سوره کوثر ایدر شرحین بیان یا فاطمه
هیکل تقوانی عالم سنده ایلر جستجو
سائلي که گوزلری گورموردی اولدون روبرو
اوندادا حفظ حجاب ایتدون سن ای با آبرو
ایلدون رخساریوی اوندان نهان یا فاطمه
ای وجودنازنینی باغ طاهایه صفا
بیر گیجه گوندوز سنی گر گورمسیدی مصطفی
تا گورردی پیشواز ایلردی ای کان حیا
سسلیردی آیرلقدان الامان یا فاطمه
خطبه ایراد ایلینده تاپشوراردی امته
چون گوروردی امتی هرگون دوشوربیر صورته
وار یری سندن قالیدی ناگران بو علته
جان ویرنده خاتم پیغنپران یا فاطمه
واقفیدی مصطفى اود ورسالار درگاهیوه
سینه مجروحیوی یانسا شرار آهیوه
مرتضا دوزمز سنون بیر دم غم جانکاهیوه
سخت اولار غیرتلیه بو امتحان یا فاطمه
مصطفی نین رحلتیندن گچممیشدی چوخ زمان
سوز یرین آلدی قاپون یاندی او دم اولدی اولان
سن حیاتیندن ال اوزدون هم علی هم دوت بالان
بوش یرون گوردوقجا ایلردی فغان یا فاطمه
بولمدی اُمت سنون صد حیف قدر و قیمتین
دم به دم یوز ویردی غم دلده چوخالدی محنتین
دائما چکدون گچنکی روزگارین حسرتین
حیف اولا بیرده قیتمزدی زمان یا فاطمه
گوگلون ایستردی گذشته ممکن اولسا اولسون حال
خاطرینده تازه لنسون خاطرات لامحال
مسجد پیغنبره گلسون اذان ویرسین بلال
صوت و لحنیندن اویانسون هر یاتان یا فاطمه
قلبیوه دولدی غم و اندوه عالم یکسره
لیک او احوالیله سن روحیه ویردین حیدره
قویمادون شیر خدانی ال آپارسون خنجره
یوخسا اولموشدی علینون باغری قان یا فاطمه
قویمادون فاش اولسون حتیٰ کوچه ده سیلی سوزون
گیزلدردین سن علیدن دائماً نیلی یوزون
بیر خدا بولدی بو سری بیر حسن بیرده اوزون
مصطفایه بس نجه ویردین نشان یا فاطمه
مرتضیٰ تا ایستدی غسلون ویروب ایدسین کفن
ماجرا اوندا ولی ذلمنه اولدی علن
لاجرم آچدی سوزی فاش ایلدی اوغلون حسن
قلب حیدردن او غم آلدی توان یا فاطمه
غسل و کفنیندن سورا شخصاً سنه قیلدی نماز
یوز دوتوب درگاه حقه ایلدی راز و نیاز
عرض ایدیب تنگ اولدی یا رب دخت طاهایه حجاز
دویدی دنیادن گیدیر قبره جوان یا فاطمه
ایستدی تابوتیوی ایتسین روان شاه کُبار
ایتدی همراهی او نی بیر عده انگشت شمار
ظاهراً یدی نفر هر تک تکی کامل عیار
باطناً تشیع ایدیردی قدسیان یا فاطمه
آیرلیق پوزدی حسینون ناگهان افکارینی
مرتضا امر ایلدی صبر ایلسین انصارینی
دوزمدون آچدون محبتله او دم قولارینی
چکدون آغوشه سن ای سّدره مکان یا فاطمه
فرصتی گوردی غنیمتدور او دم اوغلون حسن
اوز اوزون آغوشیوه سالدی یانان دلده محن
باغبان گوردی که چوخ قالمور یانا باغ و چمن
اول یانار اوتدان دوتا اوت نه مکان یا فاطمه
لاجرم مولا آیردی ارغوانی گوللری
دل توکوب دوتدی دله بیر آز او شیرین دللری
سینه وه قیتردی قویدی اول کریمه اللری
وردیلر انصار تابوته تکان یا فاطمه
چخدلار باب امامتدن تمامی اشگبار
ظلمت شبده اولوبلار شهریدن بیر آز کنار
قازدلارخاک بقیعده نصف شب گیزلین مزار
دفن ایدوب مولا سنی ناله کنان یا فاطمه
حسرتیله دوردی باخدی قبریوه بیر وای دیدی
بیر دریندن آه چکدی بیرده بیر ایوای دیدی
اوخشادی لحن حجازیله سنه لای لای دیدی
اوخشیانماز مثلینی بیر روضه خوان یا فاطمه.
امتین سالدی آراسندا او کسلر کی نفاق
یول آیردی بو نفاق اولدی بَُیوک بیر اتفاق
ایندی اوغلون مهدی صاحب زمانین باشی ساق
قانیوی بیر گون آلار بو قان آلان یا فاطمه
درگهینده بیر غلام روسیاهم ، (سادیم)
کوی عشقونده سنون افتاده وه ، افتادیم
افتخاریم بوندادور شاگرد (ذهنی زادیم)
درس آلار اوندان هامی نوحه یازان یا فاطمه
- یکشنبه
- 3
- مرداد
- 1400
- ساعت
- 10:55
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه