خلق ایلینده فاطمه ربُّ السّما سنی
الحق کی خلق ایدوبدی غمه آشنا سنی
دنیا بوئی غمیمده منیم سینه داغلادون
آخر قوجاتدی درد و غم و ابتلا سنی
ایندی اولوم اولوبدی بویوک آرزو سنه
تنها اولوم بو لحظه ده ایلور رضا سنی
سن که عم اوغلووون بولوسن یوخدی بیرکسی
حامی بولور هرآن اوزونه مرتضا سنی
بیرحالیده خدادن اولوم ایلوسن طلب
سسلور هراینه شه ملک ولا سنی
ایله ایشیم دوشوب دوگونه اولمیان کیمی
انصافیدورعجل سالا آیا ، یادا سنی
سالدی گره گشایه غریبه گره فلک
تاپدی یامان گونومده غریبه بلا سنی
عالم سنون عم اوغلووی مشگل گشا بولر
مشگل گشا بولر اوزی مشگل گشا سنی
الله بولور بو لحظه نه مشکلده قالموشام
درک ایلیوبدی موج عظیم بلا سنی
دریای غمده کشتی عمرون باتور گله
جانون چخور ولی غمیم ایتمور رها سنی
قربان اولوم اورکده غم بی حسابیوه
دلدن سالوبدی محنت بی انتها سنی
اما عم اوغلووون سنه بیر عرض حالی وار
ایسته خدادن ایتمیه مندن جدا سنی
تز تز اولوم سوزون دیلوه جاری ایلمه
گرچه اجل مکررراً ایلور صدا سنی
دور بیر یری علینی سوووندور فدا سنه
هرچند کی سالوبدی ایاقدان یارا سنی
یاگَل دوتوم سنان قولوی ایوده بیر دولان
ایلوب غریبه درده فلک مبتلا سنی
ایندی سنه علینون ایله احتیاجی وار
گر چه یوروب زمانه ده جور و جفا سنی
ای کوکب ولای علی یوما گوزلرون
چوخ گورمسین ولایته زهرا خدا سنی
اُولسن علی فراقیوه آیا نجه دوزر
گوگلوم سووور گوزوم گوره صبح و مسا سنی
باخ گور بالالارون نجه رنگ رخی سولوب
گوزیاشلی باش آچوبلار ایدولر دعا سنی
گیدسن ایوین صفاسی سنیله گیدر یقین
الله ویروبدی خانه وحٌیه صفا سنی
«ساده» سنون نیون ایکی دنیاده یوخ مگر
تاپشورسا گر حسینینه خیرالنسا سنی
- یکشنبه
- 3
- مرداد
- 1400
- ساعت
- 10:57
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه