گون تا افول ایدوب طرف کارزاریدن
آی رد ایدوب حجابی دوشوب انتظاریدن
باخدی نه گوردی یتمیش ایکی نور منجلی
یرده تلالو ایلیوری نور یاریدن
عرض و سمایه گوسترری نورینی مدام
یوخدور خبر کچن گیجه کی لیل تاریدن
معناده پنج تن جمع اولوب بیر چوخور یره
زهرا آچوبدی باش ، او گیجه کچدی یاریدن
باتدی خلاصه آی دولانوب گون گلوب گوروب
زهرا قیزی تاپوبدی گولون لاله زاریدن
بلبل کیمی باخور گولونه شیون ایلیور
قان یاش توکور عذارینه چشم خماریدن
آغلار گوزیله سسلوری جانیم سنه فدا
سالدی غمون بو دیزلریمی اختیاریدن
ایستی قوم اوستونی اوزیوه مسکن ایتموسن؟
واردور یری اولم بو غم آشکاریدن
ای وای منه کی پیکریوین یوخدی صاف یری
جسمینده اوخ یاراسی چخوبدور شماریدن
آخر نه قدری ظلم ایلیوب شامیان سنه
آثار گورسنور او کی وار انکساریدن
مندن سورا گلیبدور الون ساربان کسوب
بیر قوخمادی کسنده الون کردگاریدن
سندن کچن گیجه اورکیم ناگرانیدی
اما باشیم آیلمادی اول گیر و داریدن
نصفی یانان چادردا هراسان قیزلارون
آز قالدلار هلاک اولالار آه و زاریدن
ایله سزلدیردی سنخ نی کیمی رباب
مبهوت اولوبدی اول خبر ناگواریدن
بیر جرعه سو دئیوردی بو چولده تاپلمادی
اولدوم خجل سو اوسته سوسوز شیر خواریدن
قالدی حرم الینده غرض دامنیم منیم
دلده مزید اولوبدی غمیم انتظاریدن
الله بولور او بحبوحه ده چکمیشم نلر
حیرتدیم کی اولممیشم اول فشاریدن
امدادیمه آتام شه مردانی سسلدیم
بیر سس یتوشدی سمعیمه اول تاجداریدن
سسلوردی آغلاما بالا گلدیم هرایوه
امید وئردی قالمادیم انجام کاریدن
معلومیدور آنامدا گلوب قانلی مقتله
عطری گلور جوان آنامون بو دیاریدن
قبرینده ده جوان آنامیز دینجلنمدی
اولسم دیردی دینجلرم روزگاریدن
زهرایه خاطر آچ الیوی ایله بیر دعا
صبر ایسته بو بلا کشه پروردگاریدن
آغلار گوزیله شامه گیدور زینبون ، ولی
گتمز غمون اولونجه دل داغداریدن
- یکشنبه
- 3
- مرداد
- 1400
- ساعت
- 11:1
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه