الهی ایمدی که عمروم یتوبدی پایانه
یتور حسینیمی باری من پریشانه
وار التجا سنه یعقوبی صبریدن قوتاریب
دوباره شمسی یئتیردون او ماه کنعانه
اماندی رحم ایله غربتده زینبه یارب
دوشوبدی کشتی عمروم بلالی طوفانه
مدینه یوسفینی تز یتور باشیم اوسته
سنی قسم ویرورم آیه آیه قرانه
یامان گونومدی منیم کیمسه یاوریم یوخدی
دیار شامیده جانیم چخور غریبانه
بو آغلیان گوزومی تیکمیشم گلن یولونا
یئتورگیلن الیمی سون نفسده جانانه
سن ای همیشه باشیم اوسته حاضر و ناظر
فراق یار منی گتدی عاقبت جانه
الیمی درگهیوه آچمشام امیدیله
علاج ایله اورکیمده بو درد هجرانه
سنون الوندن اوجا هانسی الدی عالمده
سنون الوندی دوتان اللری کریمانه
دارخمشام بو ولایتده نچه مدتدی
حسینون هجری منی ایلیوبدی دیوانه
یتور حبیبیمی بو دمده باغلاسین گوزومی
غریب شهریده جان ویرمیوم یانا یانه
غم فراقی چکوب عمرومی باشا ویردیم
دونوبدی گوزدن آخان گوز یاشیم قزیل قانه
حسینون عشقینه خاطیر باشیم بلایه دوشوب
سالوبدی اود غم هجرانی خرمن جانه
ایله اسور اورگیم قبرینون زیارتینه
توکم گوزوم یاشینی قبر شاه عطشانه
چوخ آرزو ایلدیم اولمادی ولی قسمت
منی او قوش کیمی گویا سالوبلا زندانه
محال الونده سنون لا محالیدور لطف ائت
حسینی باری خدایا یتور بو نالانه
عنایتون اولاجاق زینبه بیوک احسان
نه چون رقیه ده مشتاقیدور بو احسانه
وصاله تک نه منم بیقرار دنیاده
که بی قراریدی مندنده چوخ او دردانه
فلک اونون یوزونی راضی اولمادی گولسون
گوزی گوتورمدی باخدوقجا دور دورانه
او شاهزاده نی سالمشدی بیر یامان درده
گلردی صبح و مسا درد الیندن افغانه
دیردی عمه منی چوخ داریخدرور شامات
خصوصا اهلی جفا ایلیوله مهمانه
یورلدی یومدی گوزون روزگاریدن آخر
عزاسی شامی او گون ایلدی عزاخانه
خرابه یرده اونون قبرینی اوزوم قازدوم
او نازنین بالیا مسکن اولدی ویرانه
واریمدی قورخی که منده اولم بو غربتده
قالا مزاریمز حشره کیمین غریبانه
یازاندا غم سوزونی ((ساده)) دوشدی دفتره اوت
یانوب آلشدی مقالی یتونجه پایانه
عنایت ایله الهی منیم بو شاعریمه
او دم کی لنگ گلر پای حکم و میزانه
- یکشنبه
- 3
- مرداد
- 1400
- ساعت
- 11:21
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه