ای عشقیله مبهوت ایدن خلق جهانی
تفسیر ایدن عالمه اسرار نهانی
سکّانِ سماواتی سالان حیرت محضه
مستغرق ایدن بحر بلایاده بلانی
وی قانلی باشی زمره ی ِ ارواح مَطافی
مبهوت قالوب عرشیده جمع صُلحانی
بو نیزه دی یا نخله سینادی کلیمه ؟
ترجیح ویروب جنّته موسی بو فضانی
بیر ترجمه دور قانلی باشون دینِ مبینه
اَعما نه بولر ترجمه یِ نوکِ جدانی
قرانیدی قران اوخیور نوک جداده
تفسیر ایله ای مصحف ناطق عَجَبانی
یوخ گوش ِکر ِ اهل ذلالتده لیاقت
شاد ایلوری بو لحنِ حجازی اسرانی
جانلار اولا اول نهضت خونینوه قربان
اهلِ دله کعبه ایلدون کرب و بلانی
دریای کرمسن ، کرمیندن سنون حتی'
نازلی بالاوین قویمادون آخسون یره قانی
اوجوندا آخان قانی دوتوب گویلره
سپدون
باشدان باشا زینت ایلدون عرش خدانی
مامور ایلدون منده گِدم بزم شرابه
منکوب ایدرم بزمیده جمعِ سفرانی
شامات منه بِئر ِ علم من اَسداللّه
زینبده حمایل ایلیوب تیغ دو تانی
عِرق اَسدالّله گلوب منده خروشه
سن باخما که غم ، قدّیمی ایلوبدی کمانی
اهلوندن او یرده نگران اولما حسینیم
تسخیر اِیدر آهیله ، رقیّم او مکانی
سن زینبیوه حقدن اوزون ایسته سعادت
شش گوشه مزارینده ائده اشک فشانی
دفنونده گلوب شرکت ایدم اولمادی ممکن
قسمت اولا منده گورم ای کاش او بنانی
صد حیف اوزاخ دوشدی علمدارون اوزوندن
جمع اولدی کنارینده بقیه شهدانی
یاتدی ایاقون آتدا علی اکبر ادبدن
سیننده یاتوب ، غنچه خونین دهانی
شامه گیدور آردونجا ولی باشی جداده
قان آغلادور احوالی اونون بی کس آنانی
گاهی او باشی اوینادوری نیزه ده لشگر
باخدوقجا ربابین اوجالور عرشه فغانی
گاهی آیرور باد صبا تللری تلدن
اول منظره قلبیندن آلور تاب و توانی
افسوس که چاتمور الی بیر نوکِ جدایه
تا بلکه زیارت ائلیه نازلی بالانی
عهدیمدی حسین طعنه وورام عهد (عتیقه)
بو عهد، نمایان ایلیر، عهد و وفانی
- یکشنبه
- 3
- مرداد
- 1400
- ساعت
- 11:50
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه