گینه یتوب مه محرم سراسر عالمی دوتوب غم
چکوبله قاره نه سمایه گلوب نوایه اهل عالم
اولوبدی گوئیا قیامت ایدوبدی ورد دل جماعت
حسین یارالاریوا قربان اسیر بالالاریوا قربان
غبار غم دوتوب فلکلر باتوبدی ماتمه ملکلر
آچوبدی باشینی بوآیدا بهشتیده بتول اطهر
گلوب فغانه شیرداور مدام سسلنور پیمبر
حسین یارالاریوا قربان اسیر بالالاریوا قربان
نه تک او دردمند عاشق بو درگهه بوتون خلایق
گلر دیر اورکده دردین شفا ویرر طبیب حاذق
تمام دردمند اولانلار دیر او چاره سیز قالانلار
حسین یارالاریوا قربان اسیر بالالاریوا قربان
بوآیدا دخت شیر یزدان اولوب اسیر قوم عدوان
گیدوبدی مجلس شرابه باش اگمیوب چوشیر غران
شراب مجلسینده هرآن دیردی زینب پریشان
حسین یارالاریوا قربان اسیر بالالاریوا قربان
باتوب بوآیداقانه اکبر شبیه حضرت پیمبر
گیدوب جدایه قانلی باشی گلوب نوایه غملی مادر
ایدردی اکبرین بهانه خانیم دیردی یانه یانه
حسین یارالاریوا قربان اسیر بالالاریوا قربان
بو آیدا دشت کربلاده کسیلدی نچه باش مناده
سریه سسلنوب اوغول وای باتاندا قانه شاهزاده
عزای قاسمه گلنلر ایدر نوا دیر علملر
حسین یارالاریوا قربان اسیر بالالاریوا قربان
بوآی شهید راه قران بالاسین ایتدی دینه قربان
بو عشق پاک و صبر و ایثار قویوبدی انبیانی حیران
مسیح وخضر ونوح وموسی دیردی ای عزیز زهرا
حسین یارالاریواقربان اسیر بالالاریوا قربان
سویوللارین گروه اعدا بو آیدا باغلیوبدور، اما
یاریبدی صفلری او چولده آلوب فراتی شیر هیجا
ولی سویوندان ایچمیوبدور باخوب سویا یانوب دیوبدور
حسین یارالاریوا قربان اسیر بالالاریوا قربان
بوآی بیراوت دوشوب جهانه جهان قالوبدی یانه یانه
بو آی امام کون و امکان گلوبدی ظلمیدن فغانه
حسینه ای قرا گینلر دیر بو ماتمه گلنلر
حسین یارالاریوا قربان اسیر بالالاریوا قربان
((زکی)) بو غمده سینه داغلا گوزون یاشون عذاره باغلا
فقط نه تک مه محرم حسینه هر زماندا آغلا
((عتیق)) اُل بو غمده گریان گیدونجه قبره سویله هرآن
حسین یارالاریوا قربان اسیر بالالاریوا قربان
- یکشنبه
- 3
- مرداد
- 1400
- ساعت
- 11:52
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه