دونوبدی گور نجه دور زمانه فاطمه جان
گتیردی شیر خدانی فغانه فاطمه جان
امام آغلاماز عالمده درد و محنتدن
محالیدور سالا غم صبر و استقامتدن
فراق دردی سالوبدور علینی طاقتدن
سرشکیمی چووروب لخته قانه فاطمه جان
نه یاتموسان گوزون آچ، گل تکلمه بیرآن
دانش منیله سن ای کشته ره قران
یوزونده نقش دگر نقش اولوب سنه قربان
که قبره سنله گیدور بو نشانه فاطمه جان
یانور غمونده یارالی بو غصه لی سینه
سنه جسارت ایدن کسده واردی چوخ کینه
دگوبدی ضربه مهلک سینوبدی آیینه
قباله نی ایلیبدور بهانه فاطمه جان
نه قدری یاره ووروبلار مگر بو خسته تنه
خدا بولور نه قدر ظلم اولوب جهاندا سنه
نجه یوووم بو اللی که سپر اولوبدی منه
گورنده اود سالوری جسم و جانه فاطمه جان
سالوبدی نورینی ماه تمام پیکریوه
دوشور گوزوم منه قان آغلیان او گوزلریوه
یانور بو داغلی اورک، دلده جمله غملریوه
اودور که آغلیورام یانه یانه فاطمه جان
گورنده سینه وین اوسته بو زخم مسماری
اُلوری عارضیمه اشک چشمیمی جاری
او یاره نین منه سندن ده چوخدی آزاری
بو سِرّ ، گلموری شرح و بیانه فاطمه جان
باخاندا باطن ظاهرده حسن نیتیوه
فرحلنردی علی لطف بی نهایتیوه
منه او دلده اولان عشقیله محبتیوه
فدا اولام گر، اولار منصفانه فاطمه جان
سن ای فروغ فروزان محفل عصمت
سن ای وجودی اولان خلقته بویوک علت
سن او امانتیدون سنله اشرف خلقت
چکوبدی امتینی امتحانه فاطمه جان
جهان عاریه ده نچه افتخارون وار
بیر بودور که حَق حَقدن اختیارون وار
زبان حَق واروندور که ذولفقارین وار
سالوبدی کفری تمام الامانه فاطمه جان
هنوز واردی یادمدا عطوفت ایلموسن
شرار نطقیله مسجده صحبت ایلموسن
فدا او نطقیوه زهرا، قیامت ایلموسن
اودور او خطبه اولور جاودانه فاطمه جان
مفاد خطبه ایدوب نصَ مصحفی زنده
که بند بندی سالوبدور سقیفه نی بنده
او خطبه ایلیجاخ اهل حقی پاینده
بو فخر فخر اولی صاحب زمانه فاطمه جان
بقية اللَّهِ اَعظمسَن ای سُووَرده بشر
گلوبدی شانیوه حقدن معانی کوثر
سنون وجودیوه فخر ایلیردی پیغمبر
یوزونی باخما چووردی زمانه فاطمه جان
سوزی سوز اهلی آلار مختصر اشارتدن
اشارت ایلیورم بیرده بیر عبارتدن
قیامتین گونی امت نجه خجالتدن
باشینی گوزیاجاخ آسمانه فاطمه جان
(عتیق) زنده لطف و نثار دلبردور
جهان عاریه ده تشنه کام کوثردور
اودور که قلب منیری منیر حیدردور
تفاخر ایلور سنلن جنانه فاطمه جان
- یکشنبه
- 3
- مرداد
- 1400
- ساعت
- 11:55
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه