باجین بو آیریلیقا بی قراریدور یارالی
مثال بلبل اِیشیم آه و زاریدور یارالی
نَه قدری آغلیورام دویمورام بو هجرانه
گوزوم یاشی ایله بیر جویباریدور یارالی
سنه من آغلامیوم نئینیوم اورک دوزمور
دوشوبدی قلبیمه اود شعله باریدور یارالی
بو گون بو چولده منه گوئیا قیامتیدور
غریبه یردی، عجب بیر گذاریدور یارالی
اَلون اَلیمدن اوزولدی بو دشت پرغمده
آنام دئمیشدی، بو یر غم دیاریدور یارالی
بویرده قتلیوه آچمیشدی ال جفا اهلی
بیری بیریندن عجب نابکاریدور یارالی
اوزون بویوردون اودم شمر خنجرین بوشلا
قائیت خیامه حرم انتظاریدور یارالی
نه ظلم ایدوب سنه من بولمورم خدا بولوری
ولی بو قاتل عجب کین شعاریدور یارالی
سَسیمی آلسان اگر سَس یِتور منیم سَسیمه
اورکده درد و غمیم بی شماریدور یارالی
بویور گوروم بو نجه نعشیدی سنه قربان
غریبه منظرهء ناگواریدور یارالی
نه قَدری یاره ووروب اشقیا بو گول بدنه
که پیکرون باشا باش زخمداریدور یارالی
گونون حرارتی دگدیکجه آغلیور یارا قان
قالیبدی عور، عجب روزگاریدور یارالی
خطور خاطر اولور، زینبه کچن بیر گون
هوای یثرب او گون پر شراریدور یارالی
عباوی سالمیشیدون اوستومه محبتدن
گوزومده جلوه لنور آشکاریدور یارالی
ددیم او لطفه عوض اِیلرم سنه ، بیر گون
ولیک ایندی سوزوم اعتذاریدور یارالی
اَلیم چیخوب بوشا غارتده عفو قیل باجیوی
قالان بو معجری دار و نداریدور یارالی
یانان اورکده ده بیر آیری نیسکیلم واردور
بو نیسکیلیم نَده گور جانشکاریدور یارالی
چوخ ایستیرم که اوپم بیرده بیر بوغازیندان
بو فعله مانع اولان بیر حصاریدور یارالی
ویروبدی باش باشا اوخلار بو جسم پاکونده
اوخ آتدا گول بدنون استتاریدور یارالی
گلاب ایدوب گولومی نیزه اوخ قلج یاراسی
فضاده عطری هنوز استواریدور یارالی
تمام دشت بلانی آلوبدی گول عطری
ملائک متقرب خماریدور یارالی
مشام جانه یِتَن عطریوه اوزوم قربان
صفاسی گلشنیوین صد بهاریدور یارالی
آلوب کناریوی گلشنده سوسن و سنبل
دوشن کناره، او سرو کناریدور یارالی
خجالتیننیدی گلمدی خیامه طرف
آتام علیدن عجب یادگاریدور یارالی
(عتیق) عجزیله قویموش بو آستانیه یوز
دِیَر یانان اورکیم غم دچاریدور یارالی
برات کرب و بلا ایستیور نه مدتدی
گوزون تیکوبدی یولا انتظاریدور یارالی
- یکشنبه
- 3
- مرداد
- 1400
- ساعت
- 12:8
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه