گوردی راهب گوزونه مهرِ درخشان گورونور
ددی بو شعشعه دن سرِّ فراوان گورونور
دیریدن دیشره چیخوب کشف اِیده تا اسرارین
گوردی بیر باشدی یغوبدور باشینا انصارین
نیزه دن دم به دم آفاقه سالور انوارین
صبح صادق ایله بیر چاکِ گریبان گورونور
نوک نی ده او کسیک باشه اولوب خیره بیرآز
ناگهان گوردی یارالی باش ایدور راز و نیاز
دیدی هر کیمسه دی معراج ایلیوبدور آغاز
کیم بَصیر اولسا گورور مهرِ درخشان گورونور
یوز دوتوب دِیره طرف سسلدی ای اهل وفا
ترک ایدون دیری چیخون دیشره که وار اوزگه صفا
آیری عالم یارادیب نیزه ده بیر مرد خدا
نورِحق جلوه لنور بوردا نمایان گورنور
دیمیرم گورسنوری گوزلریمه وادی طور
طوریده اولمیوب اولماز بیله بیر شورِنَشور
گوئیا حشر به پادور چالینور نفخه یِ صور
پای میزاندی هامی بی سر و سامان گورونور
آخموری خون جگر عارضیمه اوز باشینا
باخیرام دیده یِ حسرتله او نیزه باشینا
ویره لر کاش او باشی من دولانام بیر باشینا
یارالی باشدا منیم دردیمه درمان گورونور
اِله زینت ویروری نورِ رخی دنیایه
دوشسه ایّوب گوزی بو گهر والایه
ممکنی چوخدی دوشه ناله کنان صحرایه
منت حقدی، منه آیت منّان گورنور
جذبه ی عشقی ایدور راهبی سر مست و خراب
روحیمه حسرتِ وصلی ویروری رنج و عذاب
کیم بولور کیمدی بو باش کیمسه منه ویرسه جواب
حق اونا یار اولا، چون صاحب احسان گورنور
ناگهان سسلدی بیر کیمسه که ای دل نگران
قاتلی شمردی، ویردی منه بیر شامی نشان
او بولر کیمدی او باش ایلمه چوخ آه و فغان
صدرِ لشکرده دوروب صورتی خندان گورونور
لشکره ساری گیدوب تاپدی مقابلده حضور
وار سوالیم دیدی سیزدن دیدیلر امر بویور
دیدی بو قافله که ایلیری بو یردن عبور
وار کیمه نسبتی؟چون اوزگه بیر عنوان گورونور
خوش دگول ساکت اولوب قلبیمی سیز سیندیراسیز
کیمدی بو باش دیوری ذکر خدا آندیراسیز
دئمسز قلبیمی باور ایلیون یاندیراسیز
دیدیلر خارجیدور قانینه غلطان گورنور
راهبا، کرب و بلاده او باشی قان آپاروب
قاتلی شمردی جانلاردان آلوب جان، آپاروب
خولی یاخشی تانیار بیر گجه مهمان آپاروب
او کسیک باشه اودور بوردا نگهبان گورونور
گوزلرین اشکیله دولدوردی ایدوب آه و فغان
سویلدی ممکنی اولسا ویرسوز فوری نشان
عرض ایدوبلراو باشین صاق طرفینده دایانان...
صدرِ لشکرده دوروب باخ گیلن آسان گورونور
گلدی خولیله او نصرانی مقابل دایانوب
دیدی بو باشدان اوتور کاسه ی صبریم جالانوب
ویر منه باشی که باغریم ایله قانه بویانوب
طالعیمدن منه ده بو گجه مهمان گورنور
دیدی خولی وِرم حاشا بو باشی، چون که یزید
چوخ بویوک جایزه تعیین ایلیبدور، بو نوید
قسمتیمدیدی منیم اولدی کماکان، پدید
سنه ویرسم بو باشی قیمتی ارزان گورونور
دیدی راهب یولا گل بیر بیله یاندیرما منی
نچه درهم که دِیورسَن ایلیوم راضی سنی
آپاروم دیریمه مهمان بو گلِ یاسمنی
نوک نی ده گوزومه لُؤلُؤُ و مَرجان گورنور
عاقبت گتدی مسلمانی یولا دیرانی
آپاروب دیرینه مهمان ایلدی جانانی
دیدی بو قانلی باشین راهب اولا قربانی
او قدر یاره ویروبلار که آخور قان گورنور
یارالی باشی قویوب بیر داشین اوسته او جناب
یودی قانین گتیروب سپدی صورا عطر و گلاب
آخدی قان اولدی چو عمان قئیدوب ایتدی خطاب
بو آخان قان گوزومه سلسله جنبان گورونور
بخت یار اولدی منه گور نه بصیر اولدی گوزوم
چون سنی گوردی گوزوم قالمادی قلبیمده دوزوم
یارالی باشیوه قربان اولا اجدادیم اوزوم
آچ گوزون خانه ی دل گورنجه ویران گورنور
نطقه گل صحبت ایله زحمتیمی ایله قبول
سس یتور قویما اولا راهبی چوخ زار و ملول
صبح آچیلسا سنی مندن آییرار قومِ جهول
گوزومه ایندیدن اول موقع هجران گورنور
او قَدر دل دیدی آخر او باشی گَتدی دیله
دیدی هجران سوزی راهب سحره قالسون هله
حق رضاسین بو گیجه یاخشی گتیردون سن اله
ظلمت شَبده اودور جلوه یِ جانان گورونور
اجریوی حق ویره جاخ روز جزا ایلمه غم
قوی دیوم کیم سنه مهماندی کلیساده بو دم
جمعیدور پنج تنِ آلِ عبا بوردا، وَ هم
عیسیِ مریمیله موسیِ عمران گورنور
خامس آل عبا که ایشیدوبسن او منم
سَن منه عاشق و من عاشق رویِ حسنم
علتی واردی بو دمده بیله غرق محنم
باخیرام لبلرینه لبلری القان گورنور
اتام حیدردی، آنام حضرت زهرا ،راهب
شانینه غبطه ایدوب مریم و سارا، راهب
شافعِ روزِ جزا هیکل تقوا، راهب
اودی شانینده اونون سوره یِ قران گورنور
عرشِ اَعلایه او که دهریده معراج ایلدی
او که دل تیرِغمه دم به دم آماج ایلدی
او که ظلمت یولی خلق اللّهه منهاج ایلدی
جدّیم احمددی ویرور مژده که احسان گورنور
تا رسول آدینی راهب ایشیدوب چکدی بیر آه
دیدی لَا حَوْلَ وَ لَا قُوَّةَ إِلَّا بِاللَّهِ
پنج تن خاطرینه ایلدی احسان الله
شکرلله گوزیمه روضه یِ رضوان گورنور
کیمسه عالمده (عتیقا) ایده گر فکرِ عمیق
گوره جاخ آل پیمبردی اونا یار طَریق
اولماسا طِیّ طَریقینده اگر یارِشفیق
خط سیرینده اونون یکسره نقصان گورنور
- یکشنبه
- 3
- مرداد
- 1400
- ساعت
- 12:15
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه