گوردیلر یثربده بیر ناقه سوار
وارد شهر اولدی بی صبر و قرار
یثربین اهلین مخاطب ایلیوب
سسلدی ای امت بی اعتبار
روز محشر وای سیزون احوالیزه
اولمسوز بی عار و ننگ روزگار
ظاهراً مسلم ، ولیکن باطناً
دشمن آل عبایه جیره خوار
سیز او کسلرسیز ولی داوره
ایتمیسیز بیعت پوزوبسوز آشکار
درگه مولانی سیز یاندیرمیسیز
دخت طاهانی ایدویبسوز زخمدار
دویدوربسوز جانه زهرانی او گون
بولمیون بو ظلمی اصلا شاهکار
نصف شب قبره گیدوبدور فاطمه
حیدر کرار اولوبدور داغدار
هیچ دیدوز مولایه آیا تسلیت
اولدی مولایه بو نیسکیل جانشکار
کیم بولور آیا مزاری هاردادی
قبرینه گیزلینده گتدی قلبی نار
ساخلادوز یاخشی امانت دهریده
اولموسوز دینه عجب آیینه دار
ظلموزه دلدن یانوب قان آغلادی
حضرت پیغمبر والا تبار
دویمامیشدوز اوندا ظلموزدن یقین
بیرده ظلم ایتدوز جهاندا بی گدار
یوسف زهرانی میداندا قویوب
عرصه میدانیدن ایتدوز فرار
هیچ بولورسوز قالدی یالقیز شاه دین
قلب زهرایه گِنه سالدوز شرار
سو کنارینده سوسوز اولدوردولر
اهلبیت اولدی بویوک درده دچار
چکدیلر بزم شرابه زینبی
ایلسونلر بلکه، اول مجلسده خوار
چوخ مصیبت چکدی زینب شامیده
دشمنه عجز اِیتمدی اول با وقار
عاقبت یخدی یزیدی شامیده
آخر اولدی کربلایه رهسپار
قارداشین گتدی زیارت ایلدی
یثربه ایندی سالوب یول بی قرار
آیری بیر حاله قالوب دخت علی
خون دل رخسارینه ایلور نثار
سسلیور یولاردا، زار و دلغمین
قانینه غلطان اولوبدور شهریار
ایتمیوب بیعت یزیده، قارداشیم
قتلینه فرمان ویروب اول کین شعار
سو کنارینده حسینون باشینی
ظلمیله عطشان کسوب بیر نابکار
آغلادوقجا زینب اوز قارداشینه
آغلیور احوالینه هر رهگذار
باش آلوبدور یثربه نالان گلور
آز قالور باشه یتیشسون انتظار
زینب غمدیده نی پیشواز اِیدون
شهره وارد اولمیوبدور تا قطار
الغرض چاووش قورتاردی سوزون
بو خبر از بس که اولدی ناگوار
سر زنان، حضار شهری ترک ایدوب
شهریدن خارج اولوبلار دل فکار
گوردیلر ناگه او غملی قافله
روبروده اولدی یکسر آشکار
عترت طاهانی پیشواز ایتدیلر
خارج یصربده جمع بی شمار
ناگهان اول جمعیدن ناله کنان
همسر نامی صاحب ذوالفقار
دوتدی یوز ناگه بشیره سویلدی
گوندوزوم غمدن اولوب چون لیل تار
ناگرانم من حسینیمدن بشیر
بیر خبر ویر ای حسینه غمگسار
عرض اِیدوب اُلدی حسین فاطمه
چکمه یثربده او شاهه انتظار
هیچ دیمورسن ویر خبر عباسیدن
ایلیوب مدتدی که ترک دیار
نطقه گلدی سویلدی ام البنین
جمله مقصوده چاتوب اول جان نثار
واقفم عباسیمین کردارینه
قارداشین، بیر دم مگر گوزدن آتار
اَمدیقی سود اولسون عباسه حلال
بیر دم اولمازدی حسینیمدن کنار
سویلیردی جانینه قصد ایلین
نعشیمون اوستن گرک ایتسون گذار
زمزمه ایلردی دلده روز و شب
عالمی اولسون حسینسیز تار و مار
اوغلونون تعریفین ایتدوقجا خانم
زینب کبرای اولوردی اشکبار
ناله سی تا یتدی گوش جانینه
سسلدی ام البنین ، ای با وقار
جانیوه اولسون منیم جانیم فدا
آز زمان ایچره قوجالدوب روزگار
دل دیدی گتدی دله زهرا قیزین
سویلدی اولدوم عجب درده دچار
قانینه غلطان اولوب قارداشلاریم
اولمدیم بو غمده، قالدیم استوار
اولدی قسمت سرو قامت اوغلوا
کربلاده دشتینده بیر خیردا مزار
تا ایشیتدی بو سوزی ام البنین
آخدی گوزدن گوز یاشی بی اختیار
سسلدی عباس من ای وای منه
اود دوتار قلبیم بو محنتدن یانار
ایندی بولدوم، زینبین قَدی نَدن
تا اولوب، از بس چکوب رنج و فشار
باجینین بیر گونده گر بش قارداشی
اولسه واضحدور بوکر قَدین یخار
بولمورم زینب ندندور اولمیوب
صبر ایوب نبی زینبده وار
زینبه عمروم بویی قان آغلارام
ایلیوب غم لشکری قلبین حصار
چوخ مصیبت یوز ویروبدور زینبه
بو غم عظما ولی دلدن سالار
یار اولوب یاره ازل گون عشقیله
یار اودور هر دمده اولسون یاره یار
قلبینی تسخیر ایدوب حُب حسین
چوللره سالدی اودور عشق نگار
کیم ویروب عشق حسینه دلده یر
بوینونا سالدی مدال افتخار
بو حسینه جانیمی قربان اولا
ویرمیشم نوکر اونا دورت نامدار
فرصتی گَل فوته ویرمه ای (عتیق)
خدمت اِِیت بو عرصه ده اول رستگار
- یکشنبه
- 3
- مرداد
- 1400
- ساعت
- 12:20
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه