وقت او وقت اولدی یوما دنیایه زهرا گوزلرین
لازمه بولدی آچا دلده او گیزلین سوزلرین
زینبی دعوت اِئدیبدور سون نفسده خلوته
محرم اسرارینی رافتله دوتدی صحبته
اِئتدی فرمایش دوشوبدور که اله فرصت قیزیم
فرصتی گل وئرمیاخ فوته اِئداخ خلوت قیزیم
سن منه اوز روزگاریندن دانیش منده سنه
درد دل اظهار ائداخ فوت اولماسین فرصت قیزیم
دم غنیمتدور، غنیمت بول، بو دم دوشمز اَله
بیر بئله وصله قالارسان عاقبت حسرت قیزیم
آز قالور عمروم منیم چاتسین بو دنیاده باشا
دم به دم دردیم اورکده اِیلیور شدت قیزیم
ایله بیر ظلم ایلیوبدور ثانی ملعون منه
روزگاری گوزلریمده ایلیوب ظلمت قیزیم
عالم معناده طاها آغلیور احوالیمه
دردیدن تاپماز وجودیم واقفم صِحّت قیزیم
ایلرم بو علته دائم مماتی آرزو
اولمییام تا بیر کَسه من باعث زحمت قیزیم
دوشسه هر کیمسه بو احواله ائله جانه دویار
ایلمز بیرده حیاته من کیمی رغبت قیزیم
سالدی بیر احواله عالمده منی ثانی دون
آز قالور اولسون ممات حَق منه قسمت قیزیم
کیم سورشسا فوتینه اولدی سبب آیا نَلر
سویله ثانی ظلمی اولدی فوتینه علت قیزیم
قدّیمی بوکدی منیم ثانی اِئدن جور و جفا
حاش لله که دوزَلسین بیرده بو قامت قیزیم
ساچلاریم غمدن آغاردی آز زمان ایچره منیم
گورسه بو احوالی نینر مرد با غیرت قیزیم
قورخورام صبر اولدوره دریای صبری ،، درد و غم
بس که سنگیندور صبوره صبر با همت قیزیم
زینت اول دریای صَبره گرچه بحر صبرسن
صبر ائله گورسن باشیندا تیغیدن ضربت قیزیم
مجتبانین خون اکبادین گورنده طشتیده
آغلاما تا مجتبایه یِتمئیه رقّت قیزیم
تیرباران اِیلییلر مجتبانین نَعشینی
هتک حرمت اِیلییر اشرار بی حرمت قیزیم
اوز جواریمده گرک اوغلوم حسن دوتسون قرار
تا آلام آغوشیمه اولسون اودا راحت قیزیم
توپراق آلتیندا گرک قانلی دوداقیندن اوپم
مجتبانین بوسه سی اولسون منه شربت قیزیم
حق سنی خلق اِیلییوب سنگ صبور کربلا
شیر یزدانین قیزیندا لازمه سطوت قیزیم
ویر تسلا لیلیه اکبر گلنده خیمیه
اکبرین آغوشینه چکسین، ایله رافت قیزیم
قاسمین پامال ائدنده نعشینی آت دیرناقی
ویر تسلا تا سَریه اِیلسین عشرت قیزیم
منده گَلم نوفل اَل آتسا عمود آهنه
خادم القرآنه لازمدور اِئدم خدمت قیزیم
قورخورام آغوشیمه عباس ادبدن گلمیه
غیرت الله اوغلونا غالب اولار غیرت قیزیم
ذوالجناحه خیمه ده، شاهنشهی ایله سوار
گون گرکدور صورت ماهه قویا صورت قیزیم
اوخلاناندا حلق اصغر دوت ربابی صحبته
قورخورام اصغر آناسین اولدوره محنت قیزیم
بولسه اصغر اوخلانوب آغلار رقیه وای دئیر
ناله سیندن خیرداجا قیزلار تاپار وحشت قیزیم
قتلگاهه منده گلم خیمه گهدن سنده گل
ذبح اولاندا تشنه حنجر اَیلییاخ نصرت قیزیم
معجرین اولماز یقیناً چَشم بند شاه دین
شمر دون وئرمز بو امر خیریوه مهلت قیزیم
قتلگهده چوخ یوبانما تز قئید اخیامه سن
حاضر اول اخیامیده باشلانمامیش غارت قیزیم
هر نه آلسان آل حرمدن وئر گروه غارته
بیر قیزا گوشواره سیندن اِیلمه صحبت قیزیم
قصد قربتله (عتیقی) اِیلدی (شبگیر) مست
سن ولیکن ویر اوزون بو شعرینه قیمت قیزیم
- یکشنبه
- 3
- مرداد
- 1400
- ساعت
- 15:23
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه