دور ای محبته جوهر محبتون یارالی
نَدن علاقه کسوب مندن الفتون یارالی
گلوبدی شیر خدا نصف شبده افغانه
علینی یاندوروری کیف رحلتون یارالی
نه یاتموسان گوزون آچ بیر عم اوغلوی دیندیر
پوزوبدی حالیمی بو وضع حالتون یارالی
غریبه گونلره قالدیم عزیزه دو سرا
علینی یاندورار عالمده فرقتون یارالی
سسون فداسی اوزون سس یتور منه زهرا
سکوته محضه ندور علّ علتون یارالی
دانشمسان منیله باری زینبی دیندیر
اگر چه ناله سینه یوخدی طاقتون یارالی
باسوبدی باغرینا گلثوم معجرون آغلور
چکوبدی حیطه مرگه قرابتون یارالی
حسن سکوتیده، اما دوداقلاری تیتریر
گوزینده جلوه لنور حُسن رافتون یارالی
حسینون اشکی آخور دامنه نَدور چاره
آچیلدی پرده به پرده مصیبتون یارالی
اماندی گوزلرین آچ مرتضانی آغلاتما
اراده می اِیده افزون ارادتون یارالی
گوز آچ گوزومده مجسمدی روزگار مَخوف
چتیندی حیدره بس که بو ساعتون یارالی
یوزونده نقش دگر نقش اولوب سنه قربان
گوروندی کوچه ده روز قیامتون یارالی
سنه جسارت اِیدنلر منه جسارت اِیدوب
عجب خسوفه دوشوب ماه صورتون یارالی
بویور گوروم نَلر اولدی دولوبدی قان گوزیوه
سنون که بیر کَسینن یوخ عداوتون یارالی
نَدن نهان اِیلمیشدون مصائبی مندن
بو امره باعث اولوبدور دَیانتون یارالی
اورکیوین غمینی سایسالار سایا گلمز
وارون اورکده غم بی نهایتون یارالی
قاپی یاناندا نَلر اولدی بیر خدا بولوری
او گوندن اولمادی هیچ خواب راحتون یارالی
بسان نای شکسته سیزلدادون شب و روز
ولیک اولمادی حقدن شکایتون یارالی
بیر آیری عالمیدی شعله ور اولاندا قاپی
گوزومده جلوه لنور استقامتون یارالی
علی بولوردی که بیر لشکره برابرسن
گوروندی اهل حَقه استعانتون یارالی
شکسته منجر اولوب گر به صورت ظاهر
اولوبدی سقط گل باغ جنتون یارالی
ولیک صورت باطنده اولموسان غالب
یِتوبدی دینه، عجب دمده نصرتون یارالی
الی الابد قالاجاخدور ولایت علوی
سبب بو امره اولوب پاک نیتون یارالی
بو خیر نیتی مسمار در ایدوب امضا
گوروب حمایته وار قصد قربتون یارالی
نه ظلم ایدوب سنه ثانی فقط خدا بولوری
که مغسل اوسته ویرور قان جراحتون یارالی
نچه کفن عوض اِیتدیم دوباره قان اولدی
علینی سالدی ایاقدان بو محنتون یارالی
دیردیم الفتیوی کَسمسن عم اوغلوندان
فراقه اولمازیدی چون که رغبتون یارالی
کسوبسن ایندی که الفت غریب یثربدن
بهشت حَیّ ده که وار ضیافتون یارالی
علینی همره اِیله اول ضیافت نوره
بو فعله یوخدی اگر چه رضایتون یارالی
وصال احمد محمودی ایستیور گوگلوم
منه ده قسمت اولا کاش قسمتون یارالی
سنی بو نوعیله گورسه رسول عالمیان
یقین آغلاداجاخدور بو حالتون یارالی
الیوی قویما اماندور شکسته پهلویه
آتان مباد گوره خَمدی قامتون یارالی
منیم دیلیمجه سلام اِیله احمده سویله
صحت تاپوبدی لبونده جراحتون یارالی
گلنده کرب و بلایه یوزون ایله ساتر
که بلکه گورمیه عباس صورتون یارالی
یاناندا خیمه سجاد وقت غارتده
ازل مریضیدن اولسون عیادتون یارالی
آلاندا خیردا قیزین گوشواره سین باخما
دوباره یاده دوشر کوچه صحبتون یارالی
خیال کوچه گینه قلبیمه شرر سالدی
پوزوبدی حالیمی بو حال رقتون یارالی
دیار کوفیه آخر چَکر بو کوچه سوزی
جهانی یاندراجاخ بو عبارتون یارالی
دیار کوفه ده منده گرک باتام قانه
ندا گَله نه گوزلدور عبادتون یارالی
منه ده لازمه دور قانیمه اولام غلطان
تاپا ادامه رَد، پای همتون یارالی
(رضا) رضادی علیدن رضایت (محمود)
ایدوب اولاردا تجلی رضایتون یارالی
(عتیقه) آیینه (شبگیردور) ریاضتده
عجیبه خطیدی خط ریاضتون یارالی
- یکشنبه
- 3
- مرداد
- 1400
- ساعت
- 15:26
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه