ظلمیله ای دولان گوزینه لخته قان اوغول
یاندوردی قلبیمی بو غم جانستان اوغول
بلبل کیمی غمونده اگر اِیلورم نوا
قلبیم یانور فراقیوه جانیم سنه فدا
حامل اولوبدی پیکریوه قانلی بیر عبا
سِرّی نَدور، عبا ایدور عیناً بیان اوغول
گلزار عشقیده اولان ای نخل باثمر
اون سَگیز ایل او زحمتیمی اولمیوب هَدر
قان لجّه سینده کیم گوره اوغلون بیله دِیَر
ای وای منه که گلشنیم اولدی خزان اوغول
من واقفم که مقصد و منظوره چاتموسان
هرگز دِمَم که سن آناوی گوزدن آتموسان
زهرا یانیندا باشیمی عرشه اوجاتموسان
باخما اولوبدی عارضه قان یاش روان اوغول
گل نطقه بیر دانش منیله ای دلاوریم
سویله گوروم نه گلدی سنه ماه منظریم
قان آغلیور بو پیکره باخدوقجا گوزلریم
کرب و بلاده ویردون عجب امتحان اوغول
دردون نه تک ایدوبدی من زاری دلکباب
عمه لرین ایدوبدی ساچون قانیله خضاب
هر کیم سالوب بو حاله اولیدی اِیوی خراب
یخدی نه نوعیله اِیویمی همچنان اوغول
نیسکیلریم تمام یانان دلده بیر یانا
بیر نیسکیلیم قویوب منی امّا یانایانا
جسمون یقشدیراندا سالوبلار یره عبا
شاهین بو غم آلوب اورکیندن امان اوغول
هر کیمسه نین جوانی که میداندا دوغرانا
واضحدی که باخوب اونا دلدن یانار آتا
قالسا آتا او حاله یقیناً اولر آنا
چکمز منیمده اولماقیمی چوخ زمان اوغول
بیر نیزه که به ظاهر اِیدوب سینه وی مکان
باطنده ایلیوبدی منیم قلبیمی نشان
ووردی دوباره بیر یارا یعقوب همچنان
گِتدی عقابین اوسته اورکدن توان اوغول
قان لخته سی دولوبدی دو چشم خماریوه
اوندان علاوه پرده چکوب گلعذاریوه
قربان اولوم اورکده غم بی شماریوه
درد و غمون گلور منه ایله گران اوغول
دنیاده لیلیه سنیدون قلبیدن یانان
سنسیز اولوب جهاندا ایشیم ناله و فغان
یاتما عباده نازیله قربان اولوم اویان
وقت نماز ظهردی دور ویر اذان اوغول
دلدن یانوب (عتیق) بویرده مصیبته
نظمه چکوب مصیبتیمی بیر بو علته
اولسون ذخیره دار فناده قیامته
محشرده اولماسین داحی ناله کنان اوغول
- یکشنبه
- 3
- مرداد
- 1400
- ساعت
- 15:59
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه