هیچ کیمسیه وفا اِیلمز چرخ کجمدار
خلقی مدام درد و غمه اِیلیر دچار
اولسیدی گر وفاسی اِیدردی پیمبره
پیغمبرین اوزین گتیروب تنگه روزگار
تاکید اِیدردی امته طاها بو نکته نی
آنلانمیون که یوخدی بو دنیایه اعتبار
آگاهیدی بشرده اولان نَفسه لاکلام
بو نکته نی سفارش اِیدردی اودور کِرار
قدرین جهاندا بولمدیلر موقع حیات
پی در اذیت اِیتدیله پنهان و آشکار
دائم دِیَردی امته آگاه اولون هاموز
مندن صورا علیدی سیزه میر تاجدار
اینجیتمیون، رضایتی الله رضاسیدور
اولسا رضا یقین اولاسیز سیزده رستگار
نعم المسیر علی یولودور واقفم اونا
بو شرطیلن که حُبی اولا دلده استوار
یوخدور علیدن اوزگه سیزه یار و رهنما
دلدن یانار خلایقه چون بو بزرگوار
مندن صورا ولایتینه پایبند اولون
بیعتلروز مباد اولا دهریده شعار
طاها بولوردی امت علی حقینی دانار
فرمایش اِیلمیشدی دگور دور از انتظار
امری خلاصه آلدی یرین روزگاریده
سالدی آرایه تفرقه بیر عده اهل نار
جمع اولدولار سقیفیه بو نیتیله که
بلکه خلافتیندن اولا شیر حق کنار
بیر حالیده بو فکره او دم دوشدی نچّه پست
تازه علی و فاطمه اولموشدی داغدار
هیچ کیمسه بیر دئموردی که آیا نه علته
بو ظلمی ایلسوز شه بی یاره آشکار
جرات تاپوپ بو خاطره اهل سقیفه نی
بِیت ولی حقّه طرف اولدی رهسپار
ازّل که دوگدولر قاپونی اولمادی جواب
ویردی لگد او درگهه بیر نچّه کین شعار
زهرا نه گوردی چکدی علی آه جانگداز
قان آغلادی او حاله غلافینده ذوالفقار
عرض اِیلدی عم اوغلی علی اذن ویر منه
من لااقل گیدوم قاپیا تا گوروم نه وار
اذن آلدی گلدی پشت دَره دخت مصطفی
نطقه گلوب بویوردی که ای قوم نابکار
بیز دن نه ایستیسیز که بیز ایندی عزالیوخ
دلدن یتوبدی عرشه بو ماتمده آه و زار
سس گلدی که گرکدی علی بیعته گَله
گوزلور یولون خلیفه دوران بی قرار
دستوریدور اگر قاپونی آچماسان بو دم
درگاهیوه بیز اوت ویراروخ درگهون یانار
گلدی جواب اِیلمیون بیله فکر خام
من قویمارام ولی خدا تاپسین انکسار
روباهه شیر فکر اِیدیسوز بیعت اِیلیر
بو فعله اولمسوز نه سببدن امیدوار
نومید اِیتدی عاقبت اهل سقیفه نی
اوت ویردلار همان قاپیا اولدی شعله بار
یاندی گونون گون اورتا زمانینده درگهی
معناده اِیتدی حضرت طاهانی اشکبار
ای کاش آچیلمییدی قاپی، سال خیالیوه
زهرا قاپی دالندا قالور ویرسلر فشار
تنها نه پشت درده قالار دخت مصطفی
محسن قالار مصیبته بیر غنچه گول سولار
اما آچیلدی مین ستمیله یانان قاپی
حشره کیمین او غم دل عشاقی یاندورار
زهرا چاغیردی فیضّه منیم دادیمه یتیش
بو سس یتیشسه حیدره گور یاندورار یاخار؟
بیر حالیده چیخوبدی علی آستانیه
ایستکلی یار یاره او دمده نجّه باخار؟
باخدی نه گوردی قان آپارور یار یارینی
مُحسن ایاخلانور قوری یر اوسته آشکار
سسلندی سس یتور منه ای بضعه الرسول
کُونلوم قوشی بو نوعیله بلکه تاپا قرار
نطقه گلوبدی فاطمه بیر یا علی دیدی
دیندیرسه یار یارینی واضحدی دم تاپار
مخمور جام عشق مسیحادن آلدی دم
دم ویرسه یار یاره اولار باده خوشگوار
دوردی ایاقه محکم ایدوب باشدا معجرین
گوردی اولوب ولی خدا مشکله دچار
ظلمیله باغلانوبدی یدالله قولاری
نطقه گلوب چاغیردی که ای قوم پست و خوار
اَکملتُ آیه سینده علی والی دور سیزه
والی حقه اِیلمیون ظلم بی شمار
ممکن دگور که دامنین اَلدن ویرم بو دم
آمادیم یولوندا اِیدم جانیمی نثار
بیله خیال اِیلمیون تک قالوب علی
زهرا کیمی ولایتینین جانفشانی وار
اولسم اگر یولوندا منه افتخاریدور
داغلی دئیله دوباره گلون سالمیون شرار
ثانی نه گوردی بوشلاموری یار یارینی
اِیتدی اشاره قُنفذا اول مرد حیله کار
قُنفذ او دمده آلدی اله تازیانه سین
باغ بهشت لاله سین ایتدی نشان خار
بیر آیری ظلم اولوبدی قلم شَرم ایدور یازا
هوشه او دمده گیتدی او نخل شکسته بار
مولانی چکدی مسجده اوچ یوز نفر دَنی
بوبکره بیعت ایلیه تا میر با وقار
زهرا غرض که هوشه گلوب آچدی گوزلرین
باخدی علینی گورمدی قلبی اولوب فکار
فرمایش ائتدی فیضه عم اوغلوم هایاندادی
ویردی جواب آپاردی اونی فرقه شرار
دوردی او وضع و حالیله یوز قویدی مسجده
تا یتدی مسجد ایچره، امامه او غمگسار
سالدی سکوت مُبهمه اهل سقیفه نی!
حیرتدن اِیتدیلر هاموسی بیر بیرین نظار
دوتموشدی یوز سمایه او دم دخت مصطفی
گوزیاش توکوردی عارضه چون بارش بهار
سسلوردی ای خدا بو علیدور که ظلمیله
غصب ایلیوله حقینی یاددان مگر چیخار
شمشیریله نه نسبتی وار اهل منطقین
بو غملی منظره آلوری دلدن اختیار
بیعت آلولا جبریله کیمدن کیمه بو دم
آز قالدی اولدوره منی بو حال ناگوار
یا صبر ویر ئوزون منه بو فعلده و یا
آل جانیمی ئوزون منی بو غصه دن قوتار
قورتارمامیش اورک سوزینی خیره النساء
قَهر بلای حَق نچه یول اولدی آشکار
ناچار اولوب گوتوردی اَلین ظلمدن عدو
بیر عدّه دوشدی وحشته اِیتدی او دم فرار
گورجاخ علی او منظره نی قلبی دوزمدی
نطقه گلوب بویوردی گل اولما بو غمده زار
قورخوم بودور که اوت دوشه یکسر عوالمه
حقدن بو غمده ایسته سنه ویرسون اصطبار
افغانه سن گلنده دوشور لرزه عالمه
آز قالدی که خراب اولا یکسر بو روزگار
نطقه دوباره گلدی او دم دخت مصطفی
عرض ایلدی یرینده اورک تاپموری قرار
صبر اِیلرم ولیک همین بو مصیبته
هر چند که مدام سالار قلبیمه شرار
عالم یازا مصیبت عظمانی ای (عتیق)
چاتماز باشا حدیث جهان سوز هشت و چار
چوخلار چَکوبدی نظمه غم بی شماریمی
سندنده عاقبت قالار عالمده یادگار
- یکشنبه
- 3
- مرداد
- 1400
- ساعت
- 16:3
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه