هر چند که او تازه گل لاله زاریدون
گلزاریده گولوم منه سن صد بهاریدون
هر دم دوشَردی یاده آنام خیره النساء
عطرین جهاندا سَندن آلاردیم سَنه فدا
ای وای منه که تاپدی باشون دم به دم بلا
یومدون گوزون جهانه منه یادگاریدون
قربان اولوم اورکده غم بی شماریوه
اکبر دِیدون سرشکیوی توکدون عذاریوه
باخدوقجا گوزلریم او دو چشم خماریوه
یاندیم اورکدن اکبره سن انتظاریدون
عرشه اوجاتموشام من اگر آه و زاریمی
نینیم که هجرون اَلدن آلوبدور قراریمی
سیندرمشام مزاریون اوسته وقاریمی
بولسون هامی که سن منه نازلی نگاریدون
دردیم نَدور اورکده بودم یوخدی بیر بولَن
دنیانی یاندورار اِیلسم بیر بَه بیر علن
اما بیری بودور که سنه تاپمادیم کفن
بو باره ده قیزیم منه امیدواریدون
درد و غمون اولونجه منی یاندورار یاخار
سالام خیاله جلوه لنر چشم جان باخار
باخدوقجا گوز یاشیم یوزیمه سیل وار آخار
سنده منیم غمیمده بیله اشکباریدون
آلسان اگر منیم سَسیمی ویر منه جواب
ویرمه سکوتیویله منیم روحیمه عذاب
ای اِیلین خرابه شام ایچره انقلاب
سن عمه وه جهاندا بویوک افتخاریدون
ویردیم خرابه یرده که سَنله من اَل اَله
کاخ یزیده ناله لرون سالدی ولوله
یوخسا باتاردی کشتی امیدیمی گِله
بو جنگ سَردیده عجب آیینه داریدون
وار حکمتی بو عمروه گر اولمادی ثبات
دوشدی او گوز یاشون کیمی گوزدن اودور حیات
حَقدن آنام تک ایسته دین هر لحظه ده ممات
هیچ بولمدیم نه مشکله آخر دچاریدون
چوخلار گلوب سنیله اِیدوب بوردا قیل و قال
سن نطقیویله ویرممیسن بیر کسه مجال
اما یِتَن زمان الیوه دامن وصال
نطقین ندن دایاندی که سن دُر نثاریدون
دوشموشدی باشیوه هوس کربلا قیزیم
آغلار گوزیله اِیتدیم اورکدن دعا قیزیم
قسمت ایدوبدی کرب و بلانی خدا قیزیم
یاتما اویان زیارته که بی قراریدون
غربت مکاندا دوشدوم عجیبه بلایه من
بولمم قالیم، و یا که گیدوم کربلایه من
ئولم یقین گئتمسم اوردا عزایه من
سنده منیم تک حسرت دیدار یاریدون
کرب و بلاده ده گیدرم آغلارام سنه
تاپشیر میسان یادمدادی بیر سِرّی سوز منه
چاتسا اَلیم یقین اِیله بیرده او دامنه
عرض اِیلرم زیارته لحظه شماریدون
ای یاندران خرابه ده بو قلب زاریمی
سالام دوباره شامه طرف من گذاریمی
یات من گلونجه قبریده چَک انتظاریمی
چوخدا داریخما سن که غمه بردباریدون
دولدی (عتیق) اشکیله بو غمده چون گوزون
علت اودور که یاندروری قلبیمی سوزون
تکرار اِیدنده غملنیسن یوخ سوزوم اوزون
من تک ولی بو غمده هاچان زار زاریدون
بداهه سرایی در گروه مداحان و شعرای اهلبیت (ع)
- یکشنبه
- 3
- مرداد
- 1400
- ساعت
- 16:6
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه