خوش گلوبسن بو گیجه شام غریبانه آنا
آغلاما گلمه بیله ناله و افغانه آنا
باشیمی قوی یره اولده ایاقوندان اوپوم
تا قدم رنجه اولا سن کیمی مهمانه آنا
دیده حسرتیله باخما یارالی باشیما
بَلشوب یاریمین عشقیله نه چون قانه آنا
سو کنارینده اولوبدور بیله بیر ذِبحٍ عظِیم
شامیان ویرمدی سو من کیمی قربانه آنا
کربلاده سو سوزی اولموشدی قیمت جان
تشنه لب یولامیشام اکبری میدانه آنا
عشقیله قاسمیم احلیَ مِنَ عَسَل وردیله
چکدی باشه می نابی دولی پیمانه آنا
اللریم اوسته علی اصغریمی اوخلادلار
تیریله ویردیله سو طفل لب عطشانه آنا
اِیلدی نفسیله عباس جهاد اکبر
سو آلوب ایچمدی، جان ویردی یانا یانه آنا
هر قولی دوشمشیدی بیر طرفه میداندا
گتیروب قویدوم اوزون قولاری یان یانه آنا
گه اوزون قولارا باخدیم گه اوجا قامتینه
ویردیم اود سوز فراقیله دل و جانه آنا
آیری بیر حاله منی سالمشیدی احوالی
ددیلر تاپشیروری جانینی جانانه آنا
آغلیوردوم او دم اللرده ئولن قارداشیما
نالم اود سالمشیدی عالم امکانه آنا
سَسلیوردوم منیم ای آرخام اِلیم آچ گوزونی
عاقبت چاتدی سَسیم زینب نالانه آنا
تلدن سَس یتیریردی منه اول بحبحه ده
آتش شمعه آلشمشدی چو پروانه آنا
لاجرم ترک ایلدیم قانه بَلشمیش بدنی
فرقتی ایتدی یانان قلبیمی ویرانه آنا
آپاروب مشکین امانت باجیما تاپشیردیم
ویره عبداللهه توشه، باتوب القانه آنا
عجب اسباب عزا ام بنینه اپارور
گورسه مشکین اولاجاخ قلب ایوی غمخانه آنا
ایوی آباد اولا دورت اوغلی اونون قان ویردی
نخله پر ثمر دینیله قرانه آنا
وار (عتیقین) اورکینده هوس کرب و بلا
بو سببدن اَلیور گوز یاشی دامانه آنا
گوگلی ایستور که گلوب خیمه سراده دایانا
عشقیله نوحه ایدوب آغلیا جانانه آنا
- یکشنبه
- 3
- مرداد
- 1400
- ساعت
- 16:35
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه