مقدم شاهانه ی سلطان دشت کربلا
سوّم شعباندا ایلوب یثربی جنّت سرا
صبح صادقده یاییب نورین یره یوم الخمیس
بیت زهراده اولوبدی فاطمیله هم جلیس
بیر حسین کی عشقی عشّاقه اولوب دُرّ نفیس
نور باران ایلدی حیدر ائوین اول مه لقا
فاطمه آلدی قوجاقینه گهی قویدی یره
گه اوپوپ گُل صورتین گولدی ایکی گل بیر بیره
گاهی لای لای سویلدی نازیله سالدی بستره
گه دئدی جان جان حسین زهرا سنه اولسون فدا
گه سالیب گهواریه سویلردی رام اول یات بالا
ای عزیز جان مادر خامس آل عبا
اوخشیاندا وار گورردی بیر صدای جان فزا
گهوره جنباندی جبریل امین پیک خدا
فوج فوج ایلور زیارت گُل یوزین حور و ملک
شمع نوریندن آلولّار کام دل پروانه تک
عالم ناسوته ویرمیش دست قدرت بیر بزک
گُل جمالینه باخان سویلردی احسن مرحبا
واردی گویا جنت الاعلاده بیر نهر لبن
خلق ائدیب سبحان اونی خاصّ حسینیله حسن
بیرده میل ایلر اونی شیر ولایتدن امن
خاصّه سر مستان جام البلاءُ لِلولا
جدّی طاها قدوۀ اهل زمین و هم زمان
نورس زهرانی ناز ایلور یوزه اشکی روان
گوردی اسما ناگران اولدی سوروشدی ناگهان
وار نه علّت یا نبی آشفته دور حالون آقا
امر ائدیب پیغمبر رحمت ائشیت ای خادمه
بیل بو طفلین سرنوشتین قویما بیلسین فاطمه
بیر مصیبتدی ویریب اود بو دل ناشادیمه
سو کنارینده کسر باشین سوسوز قوم دغا
اود ویریب اخیامینه اطهارین ایلوللر اسیر
پا برهنه عترتی چوللرده ویلان دستگیر
قیز گلین عورت کمک سیزلر هراسان ناگزیر
یوز قویار صحرایه وحشتدن بنات مصطفی
بیر نفر اولماز کمک دورسون او ساعت عترته
وحشی حیوانات رقّتدن گللّر غیرته
یا اوچان قوشلار فضاده بال آچالّار رأفته
سو سپه لّر اتفاقاً خیمه لر خاموش اولا
یا حسین ای افتخار کشور ایران زمین
روز میلادون هر ایل ملت اولار شور آفرین
سنده دوت بو عاشقان عترتین بال و پرین
لطف قیل تاپسین شفا سن بیل بالون اصغر «صفا»
- یکشنبه
- 3
- مرداد
- 1400
- ساعت
- 17:8
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه