شعبان آینون دوردی فروزان سحر اولدی
حیدر ائوینون لاله سی قرص قمر اولدی
مشهوردی بطحاده جوانان کلابی
حیدر اودی تزویجده ایلوب بو حسابی
بیر صالحه عورت تاپالار اولدی خطابی
اول طایفه دن تاپدیلا زهرا سیر اولدی
هم نام خانم فاطمه بیر عارفه عورت
حیدر ائوینه اولدی رشیده قدی زینت
دوغدی بیر اوغول ایلکینه باشدان باشا غیرت
به به دئدی کیم گوردی عجب شیر نر اولدی
عبّاس آدینی قویدی آقا حیدر صفدر
گل صورتینه باخدی دئدی ماه منوّر
شهلا گوزینه سویلدی تحسین مکرّر
گنج علویده دئدی عالی گهر اولدی
گُل پیکرین اوپدی ائلدی منظم سینه
سسلندی گل آغوشوه آل اوغلی حسینه
جاندی سنه بو سنبل ریحان مدینه
غیرتلدی شاید سنه بیر گون خطر اولدی
عباسی حسین آلدی قوجاقینه او ساعت
گوردی او گول یاسده تندیس شجاعت
گوزلر ایری بازولر اوزون بحر صلابت
ذوق ایلدی آغزیندا بزاقی شَکَر اولدی
بابا سوله دی سیّد و سالار شهیدان
عبّاس منیم خاطریمی ایلدی شادان
ظاهردی بوی آتسا اولاجاق فخر دلیران
رشد ائتدی شجاعتده یل نامور اولدی
ایللر دولانیب اولدی غرض شصتم هجرت
زهرانون عزیز اوغلی حسین حامی امّت
کفّار له گلدی سوزه ایستیدیله بیعت
ترک وطن ایلوب شه دین در بدر اولدی
دوشدی چوله اهل حرمینن شه بطحا
چوللرده گزیب آلتی آی آوارۀ صحرا
ناگه یتشیب کرب و بلا دشتینه مولا
جبریل حسین وای سولیوب نوحه گر اولدی
بی عاطفه اعراب آلیب دور امامی
تعدادی اوتوز مین نفر اللرده حسامی
دولدوردی ریاست اورا مکریله عوامی
هر عصرده بیر جور بو روش جلوه گر اولدی
یتمیش ایکی سربازیله سلطان شهیدان
دین اوسته قیام ایلدی زنده قالا قرآن
گیدی کفن هر تک تکی آباد اولا ایمان
تا نوبت عبّاس جوان قَدر اولدی
آلدی اودا چوخ زحمتله شه دن اجازه
شکر ایلدی توفیق حق بنده نوازه
گیدی زرهین دوردی تیمّمله نمازه
مشکین گوتوروب قوم شره حمله ور اولدی
اوّلده تصرّف ائلدی نهر فراتی
دولدوردی سو مشکین یتره کامه بناتی
دوشدی یولا گتسین خیمه آب حیاتی
اوخلاندی سو مشکی سودا آخدی هدر اولدی
سو آخدیقجا طاقتی عبّاسون آزالدی
جنگاهی قشون مکریله بیراهیه سالدی
گیزلندی یول اوسته چوخی شمشیر اله آلدی
ویردیلار دوشوب ساق قولی خصمه ظفر اولدی
شمشیرین آلیب صول اله عبّاس توانا
یاره یارا اوستن دیور اتمور ولی پروا
قرمز قانا آغشته دی گل صورتی حمرا
صول الده دوشوب پیکری بی بال و پر اولدی
بسکی یارا دگمیشدی او شیر غزواته
دونمزدی دیل آغزیندا ادای کلماته
بیر نحویله ایلردی اشاره نفراته
من بی سپرم ویرمیون حالیم کدر اولدی
دوشدوم یره آتدان داخی یوخ حال نبردیم
بو مژده نی ورمیشدی بابام بیر بودی دردیم
گلسیدی آقام بیرده ایاقیندن ئوپردیم
آخر گوروشه بلکه "صفای" دگر اولدی
- یکشنبه
- 3
- مرداد
- 1400
- ساعت
- 17:10
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه