طوطی طبعیم عجب سیر ائده معنانی گزور
عشق پروانه سی تک شعله ی سوزانی گزور
دل خیال عالمی بیر صحنه ی روحانی گزور
یازا عبّاسه تولّد تزه عنوانی گزور
اولماسا لطف خداوند کریم ازلی
شاعرون هاردان اولار شعری کلامی مزه لی
باشلادیم وصف یازام برگ گُل یاس آدینا
نیّتیم اولدی تبرّک اولا عباس آدینا
خذف اشکیمی توکدوم یره الماس آدینا
بیر محبّت ایلدیم قلبده احساس آدینا
صورا گوردیم آقامون غشقی منه یار اولدی
جنت التجریه من تحت الانهار اولدی
دورد شعبانیدی عُلیا ملکه اُم بنین
اوّلین اوغلی سالیب یثرب و بطحایه طنین
نه اوغول گوزلری شهلا قول اوزون ماه جبین
کورک اَنلی اوزی پر جوش صلابتلی متین
کیم گوروب سویلدی اَب جدّینه دلخواه چیخوب
گوئیا یثربه اون دورد گئجه لیک ماه چیخوب
یایلیب طرّه سی مثل نخ کشمیر یاتیب
باش باشا قاشلاری گویا ایکی شمشیر یاتیب
بالاجا طفلدی امّا ایله بیر شیر یاتیب
سوروشار رؤیت ائدنلر چوخ امیب شیر یاتیب
یا رب حفظ ایله بو وجه الحسنی گوزلردن
ایتی شمشیر آغیر گرز آجی سوزلردن
هیبتیندن گورونور غیرتی لایحصادی
بو علی اوغلی علی صولت و بی پروادی
یا بهشت علویده گوگرن طوبادی
متن قرآنده کی نص ّ ذوی القربادی
گلدی زینب بابا امرون ندی یدّی گئجه سی
گرک آدی قویولا فاطمه آهو بره سی
چاغیروب زینبی فرمایش ائدیبدور مولا
سفره سال روشن ایله شمع هامی حاضر اولا
صورا امر ائتدی حسین آی منه ایستکلی بالا
سنده آغوشوه آل قارداشون ای شمس ولا
ایندی من سفره ی عبّاسی گتیرّم دوزه رم
نئچه مخصوص وسیلیله کنارین بزرم
حیدر و صفدر امامیدی مه تابنده
آگهیدی کچه جکدن و ندور آینده
گتدی بیر کاسه سو بیر مشک بیر اوخ سنجیده
بیر ده بیر قاره علم سفره ده ایلوب چیده
زینبی و حسنینی دولانور مات باخور
بی خبر واقعه دن گوزلرینون یاشی آخور
سفره آماده اولوب دوره لدی خرد و کبار
آلدی آغوشه علی طفلینی ایلوب دیدار
قویدی لعل لبینی سمعینه دُر قیلدی نثار
صاق قولاقینه اذان بعد اقامه صولا، یار
بویوروب شأن و وقارون شرف ناس اولدی
گوزل اوغلوم گوزل آدون سنون عبّاس اولدی
گوش هوشیله قولاق وئر سوزیمه یا ولدی
سن کچیکسن هله امّا سوز آغیر مسئله دی
بو حسینی که گورورسن گوزی قاره گله دی
نه منه بلکه هامی خلقته اعظم صله دی
سنی نوکر وئرورم ایندیدن احمر گولومه
پیش مرگ اول خطر اولسا گئت اَوَل سن ئولومه
گرد غم گورسون اگر صورتینه لکّه سالیب
یا بویوک واقعه دی دوره سینی دشمن آلیب
یوخ الیندن دوتانی قارداشون آواره قالیب
کمکی یوخدی اغیثینی دیلیندن اوجالیب
جامه ی خدمتی اگنوندن اوغول سویمازسان
منه خاطر بالا قارداشیوی تک قویمازسان
قورتاریب پند گهربارلرین میر امم
آغلیور دوره ده شدتله گوروب اهل حرم
دئدی سوز چوخدی ولی آغلامیون دای دئمرم
گُل یوزوز قطره ی شبنمله دولا ایستمرم
دور حسین قارداشون عبّاسیله با هم گوروشون
آل قوجاقونده باخیم شوقیله من سیز اوپوشون
آچدی آغوشین حسین آلدی قمر سیمانی
قول بویون اولدی ایکی مهر و محبّت کانی
اشک شوقیله بویاندی اولارون دامانی
باجی گلدی دیله قربان سیزه زینب جانی
سالماسین تفرقه دنیا ایکی گول قارداشیما
نه فلک قاروزی سالسین ستمیله باشیمه
حاصل آد قویدی سبب اولدی غم سوزانه
دئدی زینب بابا منلن دانشیسان یا نه
دوندی بو مسئله دن گرچی اورکلر قانه
چاتمیوبدی هله خوش مجلسمیز پایانه
هئچ دئمورسن بیزه بو اوخ بو سو یا مشک ندور
سفره ده قاره علم گوزدن آخان اشک ندور
بویوروب واردی اورک قان ایلین اسراری
ردّ ائدم کعبه ی دیلدن من اگر دستاری
سیزه روشن گورونر لحظه ی محنت باری
تانیارسوز بو لبن خوار قوی سرداری
یوزونه باخدیقجا من کیمی دیل داغلارسوز
هم حسینه همی عبّاسه یانیب آغلارسوز
کربلا آدلو مکانه اولاجاقسوز دعوت
اولاجاق اوردا سیزون هاموزا هتک حرمت
دشمن دین سیزه تکلیف ائده جکدور بیعت
شریان علویده تاپاجاق جان غیرت
توکولر دشمن بی عاطفه احرار اوسته
قرمزی قان زره عبّاسه اولار یار اوسته
آلاجاق پرچم اسلامی هوادار الینه
سالاجاق دوشینه مشکی اولا حق یار الینه
سویون اوستونده دگر تیغ شرر بار الینه
بیر گوزیندن اوپر اوخ بیر گوزی آغلار الینه
ایکی قول بیر گوزی سو اوسته گئدر یغمایه
سانجیلار اوخ اوخا السیز یخیلار صحرایه
نوفل شوم ویرار قهراً عمودین باشینا
باشینون قانی گوزینده قاریشار قان یاشینا
باش سیناندا سسی مخیمده چاتار قارداشینا
وای دیر اولدی هدف باشی قضانون داشینا
سسلنر گَل باجی قربانون اولوم سیندی بئلیم
دوشدی عبّاسیم آتیندان داغیلوب آرخام ائلیم
ایندی بیلدون یری واردور بابا سولسون، زینب
عرفا اهل اشارت گرگ اولسون زینب
صبر ایله غنچه لریم خوش گوله دولسون زینب
پنجه ی جور گلیب گوللری یولسون زینب
جمع ایله سفره نی بیلدون گله جک درد و غمین
ایندیدن وای بالا وای سالدی دیله امّ بنین
زینبیم سیزده او مأواده دوشرسوز دامه
چکه جک قافله وی کوفیه دشمن شامه
سرپرست سن قیزیم اوردا سن اوزون ایتامه
ظفره نائل اولارسان دُؤزه سن آلامه
قورخما من اوردا قیزیم باشوزون اوستونده وارام
هاردا مظلوم اولا بیر کیمسه الیندن دوتارام
سنی وئرّم قسم عبّاس خانم زهرایه
آنوا ، حیدر کرّار آتوا ، طاهایه
لطف ایله طبعیمه بیر نوحه یازان سرمایه
منده فخریله اولوم منزویه همپایه
انور و یحیوی تک شعریمون اولسون نمکی
اوجالار باشی « صفانون » اگر اولسون کمکی
هر نیم من سیزه بیر عمردی ثابت نوکرم
نوحه یازدیقجا گوزوم یاشینی دائم توکرم
شاخه ی مهروزی هر آن اورگیمده اکرم
بیر اوزی قاره ایتم عشقوزه منّت چکرم
دوندرن وقتیده یوز قبلیه فریادیمه گَل
سال منی یادوه قبر ایچره آقا دادیمه گَل
- یکشنبه
- 3
- مرداد
- 1400
- ساعت
- 17:14
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه