لطف ایله الهی من نادانی باغشلا
رحمت آیی بو بنده ی نالانی باغشلا
بیر عبد گنهکارم الیم بوش یوزی قاره
احسان ایله هر مجرم و عصیانی باغشلا
ای بحر کرم رحم ایله بو غرق گناهه
چک باطله هر سیّئه عنوانی باغشلا
سندن سورا یوخدور ایکی دنیاده امیدیم
ای عالمون امّیدی مسلمانی باغشلا
احسان و کرامت سنه زیبنده دی یا رب
مأیوس ایلمه طالب احسانی باغشلا
ویردیقجا ورق دفتر عمر گذرانی
من شرم ایدورم سنده پشیمانی باغشلا
ماه رمضاندی سنه وار نسبتی ربّی
بو نسبتله سائل و سلطانی باغشلا
آللّه آیی مشهوردی بو ماه مبارک
ئوز آدوه خاطر من گریانی باغشلا
رحمت قاپیلارین کی آچیبسان بیزه خاطر
گلدوک قاپوا غمزده یارانی باغشلا
دائم کرمون جوشه گلور ایلده بو ایّام
سال باشمیزه سایه ی غفرانی باغشلا
سندن یوخاری کیمدی یانان حالیمه آللّه
اشکیمله سیلیم لکّه لی دامانی باغشلا
سن ایسته دیگون طاعته یوخ منده توانا
توفیق ویر اولسون منه ارزانی باغشلا
هر ایل بیزه بیر آی سن اوروجلوقدا آچورسان
بیر خوان ضیافت گلن اعوانی باغشلا
واجبدی قوناقه اولا حرمت بویوروبسان
کافر اولا یا رافضی مهمانی باغشلا
ای طبع روانیم سوزی چک کرب و بلایه
آللّه منه بیر آغلاماق امکانی باغشلا
سالدی یادیما حُرّ پشیمانی بو سوزلر
گلدی دیدی شاها من نادانی باغشلا
خارج ایلدی چکمه لرین ئوز ایاقندان
بوینوندان آسیب سسلدی درمانی باغشلا
تز گل منی ئولدوردی بو غم داده آماندی
سال بوینوما قلّاده ی دربانی باغشلا
من آلّانیب اهریمنه خیری شره ساتدیم
اوتدان منی چک سن بیل آنون جانی باغشلا
فکر ایلمدیم ایش بورا منجر اولا مولا
گل مجرم سر گشته ی دورانی باغشلا
ای وای منه سالدیم نجه گور مشکله شاهی
آللّه منه سن نعمت ایمانی باغشلا
جبران گناه ایتمگه اولسون منه فرصت
شاد ایت منه ده روضه ی رضوانی باغشلا
سالدیم سنی من درد و بلایه بو مکاندا
کول باشیمه اولسون من رسوانی باغشلا
قویما منی بو غصّه هلاک ایلر حسین جان
گورمز گوزوم اوندا رخ جانانی باغشلا
دشمن منی قربان کسه اوّل سنه ایکاش
قابل دگولم گر چی بو قربانی باغشلا
ایلش دولانیم باشوه قربان سنه جانیم
شاباش ایلیوم اشک فروانی باغشلا
زهرا بالالارین منیدیم وحشته سالدیم
شرمنده دی حُرّون آقا وجدانی باغشلا
ویر اذن ایاقوندن اوپوم قوما قاپوندان
خوار ایتمه دل آزرده پریشانی باغشلا
رخصت ویر اولا صدق کلامیم سنه ثابت
قاندان گینیم رخت شهیدانی باغشلا
دین اوسته خوشام منده اولام قانیمه غلطان
احیا ایلیوم قانیله قرآنی باغشلا
قویما منی پیغمبر رحمت قاباغیندا
شرمنده اولام حُرّ هراسانی باغشلا
چک بیر محک عشقه گیندیر منه خلعت
قاندان بوییوم صحنه ی میدانی باغشلا
دوشسون یارالی پیکریم الوان قاباقوندا
گور نعشیمی شرمنده ی زهرانی باغشلا
سانجیلسون اوخ اوستن اوخی جسمیمده گل آچسون
راضی ایلیوم زینب کبرانی باغشلا
حلیّت آل امّا منه بیر نازلی قیزوندان
قورخوتموشام اول بلبل خوشخوانی باغشلا
عطشاندی یانور خیمه ده قزلاروی بیلّلم
بو محنته من سالدیم او طفلانی باغشلا
الان قوریوب دوشلری بیچاره ربابون
صود یوخ دیه بیلمور بالا اُمّانی باغشلا
ای شیعه بو دنیا داشین آت حُرّ مثالی
دنیا طلب انسانلارا دنیانی باغشلا
صدقیله حسین سسله آقون گتدیگی یول گت
احسان ایلسون هر کیمه پنهانی باغشلا
عمری یاریدان کچدی صفانوندا الهی
پوز دفتر عمرینده کی خُسرانی باغشلا
- یکشنبه
- 3
- مرداد
- 1400
- ساعت
- 22:19
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه