بیز سنی ویروک قسم قرآنه یابن العسگری
بیر نظر سال کشور ایرانه یابن العسگری
ظاهر و باطنده چوخلار سندن ایلور پیروی
تکیه ایلوب حجّت سبحانه یابن العسگری
ای ولیّ نعمت عظمی دعا قیل اُمّتون
شامل اولسون رحمت رحمانه یابن العسگری
تکیه گاه محکم اهل ولا سن دهرده
حافظ اول بو دولت قرآنه یابن العسگری
یا اباصالح طرفدار اولماسون بیزدن اگر
کشتی ایمان دوشر طوفانه یابن العسگری
ایسته آللّهدان بیزه توفیق ایمان و عمل
دوشمیک تا محنت خُسرانه یابن العسگری
فعلمیز کردارمیز اولسون سیزه لایق آقا
فخر ایله سن شیعه ی دورانه یابن العسگری
هیچ مسلمان بیلمیور همساینون دردین ندور
یا کیمون وار حاجتی درمانه یابن العسگری
هر کس اوز فکرینده دور تا گنج قارون آرتیرا
بیلمیور آخر اولار افسانه یابن العسگری
اوز اصولیندن چیخوب بیع الشرا بو شهرده
محتسب یوخ کفّه ی میزانه یابن العسگری
نرخ ارزاقی مشخّص ایلیور وجدانمیز
ایش قالوبدور باطنی فرمانه یابن العسگری
اهل بازارون ریا دور ایشلری باشدان باشا
آرتیرا تا سکّه ی انبانه یابن العسگری
طرد ایدور مردم یتیم اطفالی بیوه عورتی
گوز دوشنده نعمت الوانه یابن العسگری
آلّانیبدور جیفه ی دنیایه مال اندوزلر
ال آچانمور هیچ بری احسانه یابن العسگری
خواب غفلتدن هله بیر عدّه بیدار اولمیوب
ننگدور بو زمره ی خوبانه یابن العسگری
پول چوخالدیقجا اولور بعضی بصیرتدن کنار
اوز اوزین فرض ایلیور فرزانه یابن العسگری
حضرت زهرا ویرن درس حجاب و عفتی
لوث ایدیبدور تابع بیگانه یابن العسگری
واردی بیر عدّه زنان بد حجاب و بی حیا
آبرو قویموب قالا نسوانه یابن العسگری
جدّون احمد ایتدی بیر پیمان غدیر خُمّده
مؤمنی حکم ایلدی اخوانه یابن العسگری
ایندی قارداش قارداشین دیندیرمکه اکراهی وار
یا قازور قوی یوسف کنعانه یابن العسگری
درده دیمز قبر ایوینده پول و مال و دولتون
من دیدوم سن شاهد اول عنوانه یابن العسگری
ای امام عصر سن بیر چاره قیل بو امّته
چاتمامیش تا عمرمیز پایانه یابن العسگری
زینب عمّونده بو دینون اوسته چوخ زحمت چکیب
اللّری زلفی بویاندی قانه یابن العسگری
قتلگاه ایچره ایدوبدی شمریله چوخ کشمکش
گه قاچوب اخیامه گه میدانه یابن العسگری
گوردی قاتل ایستیور کسسون حسینون باشینی
ال آتوبدور خنجر بُرّانه یابن العسگری
گه اورکدن سسلنوردی یا علی امداد ایله
زینبی گتدی بو دشمن جانه یابن العسگری
گه حسینون یاره سیندن اوخلاری ایلور کنار
گوز یاشین توکدوکجه هی دامانه یابن العسگری
سینه ی شاه شهیدانه چیخاندا شمر دون
اولمادی دنیا نیه ویرانه یابن العسگری
یاره حدّیندن کچیب ظالم دیوردی دوش یره
باجسی قربان سو سوز قربانه یابن العسگری
جان ویرور لب تشنه گورمورسن مگر ای بی حیا
باش آچیق زهرا گلیب افغانه یابن العسگری
ترک ایله سن قتلگاهی قوی نه نه ام ایتسون نزول
شمعلن یانسون گرک پروانه یابن العسگری
ایستی قوملار اوسته گورسه اوغلونی زلفین آچار
ایلیور بستر تن عریانه یابن العسگری
بیر ایچیم سو اولمادی قارداشیما احسان ایدم
تشنه لب جان ویردی مظلومانه یابن العسگری
فرصت اولمادی اقلاً گوزلرینی باغلیام
یاندی دل بو آتش سوزانه یابن العسگری
قوزانور گه قتلگاهیندن حسین هر دم باخور
رحم ایله آللّه دیور طفلانه یابن العسگری
گه اشاره ایلیور زینب قیت گیت خیمیه
من ننملن عازمم رضوانه یابن العسگری
من قوتاردیم باشلانور غوغاسی زینب باشون
صبر ایله مندن سورا هجرانه یابن العسگری
آخرین لحظه دعا قان دستمازیله ایدیم
دوشمسون شیعم گرک نیرانه یابن العسگری
نوحه خوان و شاعر و کلاً عزادارانیمی
عفو ایله اوندان گتور دیوانه یابن العسگری
کچدی عمری دای صفانون اللّی دن احسان ایله
لایق اولسون بلکه بو دربانه یابن العسگری
- یکشنبه
- 3
- مرداد
- 1400
- ساعت
- 22:39
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه