دوباره عطر جنان دولدروب بو دنیانی
چکور عوالم عشق و سروره انسانی
هزاره لر اوخیور گلستان زهراده
سروش ملهم غیبی دیور بو عنوانی
بشارت اهل یقین و محمّد امّتینه
جهانه قویدی قدم شیعه حجّت ثانی
فرشتگان سماوی بحال شور و شعف
فضای نُه فلکی ایتدیلر چراغانی
ریاض جنّت الاعلاده لاله لر گل آچوب
گلوب ترنّمه مرغان باغ رضوانی
گلاب و عنبر و عودیله زینت اولموشدی
تمام صحن و سرای محیط عرفانی
یاناردی غرفه لرون شمعی حجره لرده چراغ
خسوفه چکمیشدی نوری ماه رخشانی
او قصرلرده یانور رنگ رنگ لاله لری
تشعشعاتی ایدور خیره چشم غلمانی
بو شور و حال و شعف عرش و فرشون اوستونده
کمال حیرته سالموشدی فوج حورانی
مه صیامدی رحمت آیی خدای رحیم
بو آیون اون بشی حق آچدی خوان احسانی
گلوبدی باره گوزل نخل دین ثمر ویردی
مزیّن ایلدی بیر طفل بیت زهرانی
بلی دوغولدی بو گون حضرت امام حسن
یازیلدی دفتر تقدیره عهد و پیمانی
گُل آچدی گلشن باغ امامت علوی
اونون قدومی فرحلندیروبدی طاهانی
بویوردی اشرف اولاد بو البشر اسما
گتور قوجاقیمه ویر طفل ماه سیمانی
گتوردیلر آلوب آغوشه تازه مولودی
گه اوپدی لعل لبین گه جمال زیبانی
بو نازدانه منیم نور دیده گانیمدی
دیدی اوجالتدی او دم عرشه آه سوزانی
چکوبدی باغرینا جان تک او ناز پرورینی
سالوب تحیّره زهرانی چشم گریانی
دوداقلاریندان اوپوب حسرتیله آغلاردی
سرشک چشمین عذاره الردی پنهانی
سوروشدیلار نیه آغلورسان ای رسول خدا
بویوردی من نجه فاش ایلیوم بو جریانی
ندور سبب دیدیلر بو نوای جانسوزه
غبار غم بورودی فوق عرش اعلانی
علی الخصوص آناسی فاطمه سؤال ایلدی
نه عیبی وار بالامون فاش ایله قضایانی
مخاطب ایلدی زهرایه ناگران اولما
بیر آیری غمدی منی آغلادان بالام جانی
گوزوم دوداقینه دوشدوگجه غفلتاً یانورام
مجسّم ایلیورم دیلده لیل هجرانی
نجه دیوم سیزه گتدی خبر امین خدا
خموش ایدولّه بو مشکوه عشق و ایمانی
غریب ایدولّه بو مظلومی دار دنیاده
بلا گونونده قاچار دوره سیندن اعوانی
سموم مهلکه اکبادی اودلانار بیر گون
جگرلری توکولر طشته جوش ایدر قانی
جنازه سینی مزاره گیدنده اوخلالار
بو یرده نالیه گتّدی او جمع نالانی
بقیعده سنه همسایه دور قزیم زهرا
نه چلچراغی اولار قبروزون نه ایوانی
چکرسن اوردا اوزون مجتبانی آغوشه
عزا بساطی ایدرسوز او سطح غبرانی
قوناقلاروز گلر اقصی نقاط دنیادن
نظرده ساخلا او زوّار اشکریزانی
"صفا" ده ایسته مزارونده اشکریز اولسون
قرین لطف ایله گلسه برسم مهمانی
- یکشنبه
- 3
- مرداد
- 1400
- ساعت
- 22:45
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه